Tacikistanda istehlakçı inamı indeksi Mərkəzi Asiya regionunda dörd ölkə arasında ən yüksək olaraq qalır.

KONKRET.az xəbər verir ki, bu barədə “Freedom Finance Global” təşkilatının aylıq makroiqtisadi araşdırmasında deyilir. Oktyabrda Tacikistanın 1200 sakini arasında aparılan sorğuya əsasən bu göstərici 7,8 bənd artaraq 151 bənd təşkil edib.

Müqayisə üçün qeyd edək ki, İstehlakçı Güvən İndeksi Qazaxıstanda 103,3 bal, Özbəkistanda 134,4 bal, Qırğızıstanda isə 129,2 baldır. Oktyabrda Mərkəzi Asiya ölkələrində ardıcıl ikinci ay artım müşahidə olunub.

Qazaxıstan da özünü müsbət tərəfdən göstərib və 100 ballıq həddi inamla keçərək son 12 ayda ən yüksək istehlakçı inamını nümayiş etdirib. Tədqiqat müəllifləri həmçinin Tacikistanda iqtisadi vəziyyətin dəyişməsini yüksək qiymətləndirirlər. İqtisadiyyatın ötən il ərzində müəyyən dərəcədə yaxşılaşdığına inananların payı sentyabrda 74,8%-dən oktyabrda 80,7%-ə yüksəlib.

Tacikistan sakinlərinin maaşları ancaq yeməyə gedir

Son bir ildə respublikada şəxsi maliyyə vəziyyətində baş verən dəyişikliklərlə bağlı təxminlər də nəzərəçarpacaq dərəcədə artıb. Oktyabrda vəziyyəti yaxşılaşanların xüsusi çəkisi sentyabrda olan 58,1 faizlə müqayisədə 66,1 faiz təşkil edib. Respondentlər arasında növbəti ay üçün inflyasiya gözləntiləri sentyabr sorğusunda 20,8%-dən oktyabrda 14,8%-ə qədər azalıb. Oktyabrda belə respondentlərin payı Qazaxıstanda 24,6%, Özbəkistanda 19,6%, Qırğızıstanda 8,0% təşkil edib. Yüksək optimizm səviyyəsinə baxmayaraq, Tacikistan sakinləri regionda ən əlverişsiz vəziyyətdədirlər. Rəsmi statistikaya görə, bu ilin ikinci yarısının əvvəlində Qazaxıstanda orta əmək haqqı 807 dollar, Özbəkistanda 358 dollar, Qırğızıstanda 352 dollar, Tacikistanda isə 203 dollar təşkil edib.

Natiq Səlim,

KONKRET.az