ABŞ prezidenti Donald Tramp Avropa İttifaqı ölkələrindən Çin məhsullarının idxalına tətbiq olunan gömrük rüsumlarını artırmağı tələb edir.

KONKRET.az xəbər verir ki, bu tələb Vaşinqtonla Avropa İttifaqı arasında ticarət sazişi bağlanmasının əsas şərtlərindən biri kimi irəli sürülüb.

Xəbərdə bildirilir ki, Trampın məqsədi Çinlə ticarətdə daha sərt mövqe tutmaq və Avropa İttifaqını bu məsələdə ABŞ-la həmrəylik göstərməyə məcbur etməkdir. Onun bu addımı, Çin mallarına qarşı tətbiq edilən rüsumların artırılması vasitəsilə Pekin üzərində iqtisadi təzyiqi artırmaq niyyətini əks etdirir. Eyni zamanda, Trampın tərəfdarları bu siyasəti ABŞ-ın sənaye sahələrinin qorunması və ticarət balansının yaxşılaşdırılması istiqamətində strateji addım kimi dəyərləndirirlər.

Məlumata görə, Avropa İttifaqı ölkələri bu tələbə qarşı müxtəlif mövqelər nümayiş etdirirlər. Bəzi ölkələr iqtisadi maraqlarını nəzərə alaraq əlavə rüsumların tətbiqinə ehtiyatla yanaşır, digərləri isə ABŞ-la əlaqələri möhkəmləndirmək üçün Trampın təklifini dəstəkləyə bilərlər.

Bununla yanaşı, ticarət müzakirələrinin gələcəkdə necə davam edəcəyi və qarşılıqlı razılığın əldə olunub-olunmayacağı hələlik dəqiqləşməyib.

Müşviq Tofiqoğlu,

KONKRET.az