“Paşinyan Rusiya ilə Qərb arasında siyasi manevrlər etmək üçün yöndəmsiz cəhdlər etsə də, o, tamamilə qərbyönlü siyasətçi olub və olaraq qalır”.
KONKRET.az xəbər verir ki, bu fikirləri belaruslu ekspert Yuri Uvarov öz məqaləsində vurğulayıb.
Müəllif yazır ki, “Sovet İttifaqı dağılandan bəri Ermənistan ildən-ilə yoxsulluq və korrupsiya uçurumuna doğru sürüşür. Və məhz korrupsiyaya qarşı mübarizə Paşinyanın seçki proqramının əsas tezisinə çevrilmişdi. 2018-ci ildə o, baş nazir postunu tutub. Və insaf naminə seçicilərə verdiyi vədi yerinə yetirməyə çalışıb.
Müəyyən uğurlar əldə edilib: Korrupsiyanı Qavrama İndeksində respublikanın reytinqi yaxşılaşıb. Ermənistan da İqtisadi Azadlıq İndeksində 13 pillə yüksəlib. Qərb də Ermənistanı “azad internet”inə görə tərifləyir. İrəvanda çoxlu müsbət dəyişikliklər baş verib – şəhərin görkəmi xeyli yaxşılaşıb. Ancaq indekslərdən və “pulsuz İnternetdən” doymayacaqsınız. Çünki Ermənistanın iqtisadi səviyyəsi hələ də arzuolunan deyil.
Ən əsası isə onu İlham Əliyevin təcrübəsi və nüfuzu ilə müqayisə etmək belə çətindir. İlham Əliyev Qafqazda siyasət titanıdır, dünyada belə siyasətçidən çox az qalıb. Neft və qazla zəngin Azərbaycanın iqtisadi səviyyəsi Ermənistandan xeyli yüksəkdir. Əliyev Qərblə incə oyun oynayır. Eyni zamanda, o, Moskva ilə yaxşı münasibət saxlayır. Məncə, bu gün o, yalnız iki liderin – Putin və Ərdoğanın fikirlərini dinləyə bilər.
Bildiyiniz kimi, Ermənistan Qarabağ uğrunda diplomatik müharibədə artıq mahiyyətcə uduzub. Və bu gün Ermənistanın özündə bunun günahı birbaşa Paşinyanın üzərinə qoyulur. Əminəm ki, İrəvan Moskvaya daha yaxın olsaydı, Qarabağla bağlı danışıqların sonu başqa cür ola bilərdi. Amma Paşinyan qərbyönümlü xətt yürütməkdə davam edərək, Moskvadan tamamilə uzaqlaşmaq və Qərblə yaxınlaşmaq, hətta NATO-ya daxil olmaq həddinə qədər axmaq bəyanatlar verməklə özünü daha da çıxılmaz vəziyyətə saldı.
Çünki Putin səviyyəsində olan siyasi oyunçu ilə zarafat etmək son dərəcə təhlükəlidir. Daha çox indi Qərbin qucağına atılan Paşinyan Makronu öz kuratoru kimi qəbul etdi. Bundan daha pis bir şey təsəvvür edə bilmirəm.
Paşinyan Əliyevlə erməni hərbçilərin Qarabağ ərazisindən tamamilə çıxarılması ilə bağlı əldə edilmiş razılaşmaları pozub. Və bununla da hərbi qarşıdurmaya bəhanə yaradıb.
İndi erməni politoloqları ən acınacaqlı perspektivlərdən danışırlar. Məşhur erməni sosioloqu Armine Adibekyan deyib: “Bizi işğal və qırğın gözləyir”. Onun fikrincə, Ermənistanın mövcud olmasına sayılı günlər qalıb. Ən pis ssenari, erməni politoloqların fikrincə, belə olacaq: Azərbaycan Ermənistanın bütün ərazilərini Azərbaycan anklavları ilə Gürcüstan sərhəddinə qədər işğal edəcək, respublikanın bir hissəsi isə Türkiyə tərəfindən tutulacaq. Bu ssenaridə Qarabağın taleyi aydındır”.
Natiq Səlim,
KONKRET.az