Yaponiya Nazirlər Kabineti çərşənbə axşamı keçirilən iclasda ölkədə qiymət artımının mənfi təsirlərini azaltmaq üçün ümumilikdə 2,2 trilyon yen (təxminən 16,7 milyard dollar) məbləğində tədbirlər proqramını təsdiqləyib.

KONKRET.az xəbər verir ki, bu barədə “Kyodo” agentliyi məlumat yayıb.

Bildirilib ki, proqram aztəminatlı ailələrə birdəfəlik 30 min yen (təxminən 230 ABŞ dolları), belə ailələrdəki hər uşaq üçün isə 50 min yen (təxminən 380 ABŞ dolları) məbləğində vəsaitin ayrılmasını nəzərdə tutur.

Bundan əlavə, may ayında elektrik enerjisi qiymətləri hər ailə üçün orta hesabla 800 yen (təxminən 6 dollar) azaldılacaq.

Qeyd edək ki, bu ilin yanvar ayında Yaponiyada istehlak qiymətləri bir il əvvəlki göstərici ilə müqayisədə 4,2% artıb. Buna idxal olunan ərzaq və enerji məhsullarının qiymətinin qalxması səbəb olub.

İqbal Rzayev,

KONKRET.az