Astarada yol-nəqliyyat hadisəsi törətməkdə təqsirləndirilən İmaməli Əliyevin cinayət işi üzrə ibtidai istintaq başa çatıb.
KONKRET.az xəbər verir ki, toplanan iş baxılması Lənkəran Ağır Cinayətlər Məhkəməsinə göndərilib.
Cinayət işi hakim Cəlil Nəbiyevin icraatına verilib.
Məhkəmənin ilkin hazırlıq iclasının vaxtı hələlik açıqlanmayıb.
Qeyd: Hadisə ötən ilin oktyabrında Astara rayonunun Heydər Əliyev prospektində qeydə alınıb.
Belə ki, rayonun Ərçivan kənd sakini, 19 yaşlı İmaməli Arif oğlu Əliyevin idarə etdiyi 07-BD-877 dövlət qeydiyyat nömrə nişanlı “VAZ-2107” markalı avtomobil hərəkətdə olarkən yağışlı havada idarəetməni itirərək, yol kənarındakı iri gövdəli ağaca çırpılıb.
Zərbənin təsirindən avtomobilldə olan 18 yaşlı sərnişin İmaməli İsmayıl oğlu Hüseynov aldığı xəsarətlərdən hadisə yerində dünyasını dəyişib.
Daha sonra İmaməli Əliyev saxlanılıb.//Pravda.az