Artıq bir neçə gündür ki, çox ciddi böhran vəziyyətindəyik, Azərbaycan artıq qazın verilişini dayandıraraq bizə qarşı “qeyri-insani” münasibətini bu gün də davam etdirir.

KONKRET.az xəbər verir ki, bunu Qarabağdakı qondarma quruma Rusiyanın təlimatı ilə göndərilmiş və “dövlət naziri” təyin olunmuş Ruben Vardanyan Facebook səhifəsində canlı yayımda bildirib.

“Bu o deməkdir ki, biz bütün enerji xərclərimizdə qənaətcil olmalıyıq. Həyat tərzimizi qorumaq üçün hər şeyi etməliyik, lakin digər tərəfdən böhranın hamımız üçün reallığa çevrildiyi aydındır” – deyə Vardanyan bildirib.

Qondarma rejim rəhbəri daha sonra müraciətini belə davam etdirib:

“Biz hamımız mübarizəyə hazırıq. Bu vəziyyətdə “Artsax”lıların kim olduğunu, bütün çağırışlara necə müqavimət göstərdiyini və heç kimdən qorxmadığını göstərmək lazımdır. Bəli, çətin olacaq, amma hamımız “qalib” gələcəyik”  – deyə Vardanyan sərsəmləyib.

O, qondarma “Artsax” əhalisini güclü olmağa və bu vəziyyətdən çıxa biləcəklərinə inanmağa çağırıb.

“Biz məktəbləri bağlamalıyıq. Sabahdan odun sobası ilə qızdırmaq imkanı olmayan məktəb və universitetlər işləməyəcək. Zəhmət olmasa diqqətli olun, çünki bu vəziyyətin nə qədər davam edəcəyini bilmirik” – Vardanyan bildirib.

Onun heç bir məntiqə uyğun olmayan fikrinə görə, Azərbaycanlılar böyük səhvə yol verib.

“Bu variantla Azərbaycanlılar heç kimə sübut edə bilməzlər ki, biz onlarla birləşib nə isə edə bilərik”, – deyə Vardanyan çərənləyib.

Günel Mikayılova,

KONKRET.az