Mayın 4-də paytaxtın Yeni Günəşli qəsəbəsi ərazisində yerləşən apteklərin birindən uşaq yeməkləri oğurlamaqda şübhəli bilinən qəsəbə sakini 21 yaşlı İlkin Məmişov polis əməkdaşları tərəfindən saxlanılıb.
Bu barədə KONKRET.az-a Daxili İşlər Nazirliyinin Mətbuat Xidmətinin əməkdaşı Nurlan Əliyev məlumat verib.
O bildirib ki, məhkəmənin qərarı ilə həmin şəxs 20 sutka inzibati qaydada həbs edilib:
“Onun uşaq yeməyini övladı üçün oğurlaması iddiaları həqiqəti əks etdirmir”.
“Suraxanı Rayon Polis İdarəsinin 33-cü Polis Bölməsində aparılan araşdırmalarla onun uşaq yeməklərini satmaq məqsədilə oğurlaması məlum olub və o, bunu izahatında da etiraf edib”, – DİN rəsmisi vurğulayıb.
***
Sözügedən xəbərlə bağlı “Qafqazinfo”nun səhifəsində gedən müzakirəyə cavab olaraq Daxili İşlər Nazirliyinin şöbə rəisi Elşad Hacıyev bildirib ki, həmin şəxs oğurladığı qida məhsullarını satmaq məqsədilə talayıb:
“Övladı onun himayəsində deyil. Əmələ görə onun barəsində məhkəmə qərarı ilə 20 sutka həbs növündə inzibati tənbeh tədbiri tətbiq edilib. O, əvvəllər iki dəfə oğurluq əməllərinə görə məhkum edilib”.