İsveç NATO-ya üzvlük ərizəsini təsdiqləmək üçün Ankaranın tələblərini yerinə yetirməyə hazırdır.

KONKRET.az xəbər verir ki, bu barədə “Bloomberg” Türkiyə rəsmilərinə istinadən məlumat yayıb.

Bildirilib ki, İsveçin Baş naziri Ulf Kristersson Türkiyə Prezidenti Rəcəb Tayyib Ərdoğanla krallığın NATO-ya üzvlüyü ilə bağlı danışıqlar aparmaq üçün bu gün Ankaraya səfər edəcək.

O daha əvvəl bəyan edib ki, İsveç hökuməti PKK ilə əlaqəsi olan təşkilatlarla əməkdaşlıq etməyəcək.

Məlumata görə, İsveç 2019-cu ildə Türkiyəyə hərbi texnikanın ixracına təbiq etdiyi məhdudiyyətləri də aradan qaldırıb.

Qeyd edək ki, mayın 18-də İsveç və Finlandiya alyansa qoşulmaq üçün müraciət edib, lakin üzvlük prosesi Türkiyə tərəfindən dərhal bloklanıb. Ankara bu ölkələrdən 2016-cı ildə dövlət çevrilişinə cəhddə iştirakda ittiham olunan şəxslərin təhvil verilməsini və silah tədarükünə qoyulan qadağaların aradan qaldırılmasını tələb edir.

İqbal Rzayev,

KONKRET.az