Ukraynada 10 milyona yaxın istehlakçı işıqsız qalıb, qış ərəfəsində 630 mindən çox insana humanitar yardım edilib.

KONKRET.az xəbər verir ki, bunu BMT-nin Baş katibi Antonio Quterreş Ukraynaya kömək məqsədilə Parisdə təşkil olunan beynəlxalq konfransın iştirakçılarına videomüraciətində bildirib.

Ukrayna hökumətinin məlumatına görə, ölkənin enerji infrastrukturunun 50 faizi Rusiya Silahlı Qüvvələrinin raket hücumu nəticəsində məhv edilib.

Ukraynanın Baş naziri Denis Şmıqal dekabrın 9-da etiraf etmişdi ki, bütün İstilik Elektrik Stansiyaları (İES), Su Elektrik Stansiyaları (SES) və yüksək gərginlikli elektrik şəbəkəsi obyektlərinin 40 faizi müxtəlif dərəcədə zədələnib. Bu səbəbdən ölkədə qış fəsli boyunca elektrik enerjisi istehlakı ilə bağlı məhdudiyyətlər mövcud olacaq.

Xatırladaq ki, keçən ayın sonunda Ukrayna Prezidenti Vladimir Zelenski çıxışı zamanı 6 milyondan çox abonentin işıqsız qaldığını bildirmişdi.