Dağıstan ərazisində qalan 252 Azərbaycan vətəndaşı ölkəyə qayıtdı – FOTO – VİDEObackend

Dağıstan ərazisində qalan 252 Azərbaycan vətəndaşı ölkəyə qayıtdı - FOTO - VİDEO

Rusiyanın Dağıstan Respublikası ərazində qalan daha 252 Azərbaycan vətəndaşının bu gün ölkəyə qayıtması təmin olunub.

KONKRET.az-ın məlumatına görə, Rusiya ilə sərhəddə vətəndaşlar “Samur” keçid məntəqəsindən ölkəyə daxil olub. Onlar xüsusi ayrılmış avtobuslar vasitəsilə sərhədi keçiblər.

Soydaşlarımız Fövqəladə Hallar Nazirliyi tərəfindən Rusiya Federasiyası ilə sərhəddə – Qusar rayonunun ərazisində yerləşən “Samur” sərhəd-keçid məntəqəsinin yaxınlığında yaradılmış qəbul-çeşidləmə məntəqəsinə yerləşdirilib. Onlar ilk olaraq müvafiq tibbi yoxlamadan keçirilib.

Qəbul-çeşidləmə məntəqəsində eyni vaxtda 1200 nəfərin yerləşdirilməsi üçün şərait yaradılıb, sanitar-gigiyenik tələblər tam təmin olunub, qidalanma, gigiyenik vasitələrlə təchizat və s. ilə bağlı bütün lazımi tədbirlər həyata keçirilib.

Sərhəd-keçid məntəqəsində ilkin tibbi müayinədən keçən şəxslərin FHN-in qəbul-çeşidləmə məntəqəsində fəaliyyət göstərən və müvafiq tibbi avadanlıqlarla təchiz edilmiş tibbi briqadaları tərəfindən təkrar müayinəsi və burada karantin rejimində müvəqqəti qalması təmin edilir.

Həmçinin hər hansı şübhəli əlamət aşkar edilən şəxslərin daha dəqiq diaqnoz qoyulması üçün xüsusi ayrılmış müvafiq yerli xəstəxanaya təxliyəsi nəzərdə tutulur.

Dağıstandan Azərbaycana gətirilən Şəmkir rayon sakini Xalid Kazımov deyib ki, 74 gün qonşu ölkədə qalıb: “Vətənə qaytarılmağımızın təmin olunması üçün Azərbaycan Prezidentinə təşəkkür edirəm. İnşallah orda qalan vətəndaşlarımız da qısa müddətdə qayıdar”.

Xədicə Hacıyeva bildirib ki, ölkəyə gəlməmişdən öncə onları siyahıya alıblar, bu gün də Vətənə qayıdıblar: “Bura çatan kimi bizi yeməklə, yataqla təmin etdilər. Hər şeydən razıyıq”.

Fövqəladə Hallar Nazirliyinin Mülki Müdafiə Qoşunlarının “N” saylı hərbi hissəsinin tibb xidmətinin rəisi Xəyyam Məmmədov APA-nın yerli müxbirinə bildirib ki, Rusiyadan gətirilən Azərbaycan vətəndaşları 14 gün karantində saxlanılacaq. Onun sözlərinə görə, Azərbaycana gətirilən 252 nəfərdən koronovirusa görə testlər götürülüb: “Hər hansı vətəndaşda COVİD-19 əlaməti aşkar olunarsa, onlar xüsusi ayrılmış tibb müəssisələrinə yerləşdiriləcək”.

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

*

*

*