Gürcüstanda hakim “Gürcü arzusu” partiyası prezident Salome Zurabişvilinin impiçment proseduruna yenidən baxmaq niyyətindədir.
KONKRET.az RİA Novostiyə istinadən xəbər verir ki, bunu jurnalistlərə parlamentin spikeri Şalva Papuaşvili məlumat verib: “Parlament impiçment prosedurunu yenidən başlatmaq qərarına gəlib”, deyən spiker bildirib ki, deputatlar hətta parlament seçkilərinə qədər də Konstitusiya Məhkəməsinə müraciət edəcəklər.
Papuaşvilinin sözlərinə görə, “Gürcü arzusu” Zurabişvilinin baş nazirin razılığı olmadan həyata keçirməyə davam etdiyi xarici səfərlər səbəbindən bu addımı atıb.
Parlamentin sədri vurğulayıb ki, Zurabişvilinin səlahiyyət müddəti bu il başa çatsa da, onun impiçment yolu ilə vəzifəsindən uzaqlaşdırılması vacibdir.
Eyni zamanda o, bu məsələyə 26 oktyabr seçkilərində “Gürcü arzusu”nun parlamentdə çoxluq qazanmasından sonra baxılacağına əminliyini ifadə edib. Hökumətlə razılaşdırılmayan xarici səfərlər Zurabişvili ilə hakim partiya arasında fikir ayrılığına səbəb olub.
Keçən il “Gürcü arzusu” prezidentin impiçmenti tələbi ilə iddia qaldırıb, oktyabrda məhkəmə Zurabişvilinin qanunları pozması barədə qərar çıxarsa da, parlamentdə kifayət qədər səs toplaya bilmədiyi üçün impiçment baş tutmayıb.
Vəli Həsənoğlu,
KONKRET.az