Prezident İlham Əliyev “Azərbaycan Respublikasının Əmək və Əhalinin Sosial Müdafiəsi Nazirliyi tərəfindən mənzillərin satışı və satışdan əldə olunan vəsaitdən istifadə Qaydası”nın təsdiq edilməsi haqqında Fərman imzalayıb. Fərmana əsasən Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin sifarişi əsasında Bakı şəhəri Sabunçu rayonunun Ramana qəsəbəsində, Qaradağ rayonunun Ümid qəsəbəsində, Binəqədi rayonunun Хocəsən qəsəbəsində, Abşeron, Lənkəran və Samux rayonlarında inşa edilmiş çoxmənzilli binalarda, həmçinin Bakı şəhəri Sabunçu rayonunun Kürdəxanı qəsəbəsində və Abşeron rayonunda inşası davam etdirilən çoxmənzilli binalarda yerləşən mənzillərin satışı qaydası müəyyən edilib. Qaydaya əsasən, mənzillərin satışı Nazirliyin rəsmi internet saytı vasitəsilə onlayn qaydada, yaxud hərrac vasitəsilə həyata keçirilir.

Bəs görəsən, bu mənzillərdən kimlər yararlana biləcək? Mənzillərin satışı nə dərəcədə şəffaf olacaq?

Mövzu ilə bağlı KONKRET.az-a danışan əmlak eksperti Ramil Osmanlı bildirib ki, hələlik bir sıra detallar bəlli olmayıb:

“Fərmandan irəli gələn məsələlələrin həlli üçün Nazirlər Kabinetinə vaxt verilib. Həmin müddət bitdikdən sonra detallar müəyyən ediləcək. Yalnız o zaman həmin mənzillərin kimlərə satılacağı aydın olacaq. Ola bilsin ki, güzəştli mənzillərin hər kəsə açıq satışı keçirilsin. Yaxud da hansısa kateqoriyadan olan şəxslər bu mənzilləri ala biləcək. İndiki halda nə isə demək çox tezdir”.

Ekspertin fikrincə, güzəştli mənzillərin satışı texniki məsələdir:

“Satışın kimlər tərəfindən və hansı qaydalarla həyata keçiriləcəyi bəlli deyil. Ona görə də, bu mənzillərin satış proesisinin nə dərəcədə şəffaf olacağı da sual altındadır. Sosial mənzillərin satışı ilə bağlı bu yaxınlarda neqativ hallar yaşandı. Ümid edək ki, güzəştli mənzillərin daha şəffaf şəkildə satışı baş tutacaq”.

Şəbnəm Mehdizadə,
KONKRET.az