İmadəddin Nəsiminin 650 illik yubileyi Nyu-Yorkda qeyd edildi – FOTObackend

İmadəddin Nəsiminin 650 illik yubileyi Nyu-Yorkda qeyd edildi - FOTO

Diasporla İş üzrə Dövlət Komitəsinin təşkilati dəstəyi ilə Nyu-York şəhərində görkəmli Azərbaycan şairi İmadəddin Nəsiminin 650 illik yubileyinə həsr olunmuş konsert proqramı təşkil edilib. KONKRET.az-a komitədən verilən məlumata görə, konsertdən əvvəl tanınmış pianoçu, Əməkdar artist Nərgiz Əliyarova Nəsimi dühası haqqında və “Nəsimi ili” mövzusunda çıxış edib.

Konsert proqramı çərçivəsində “Amerika Muğam Cəmiyyəti”nin sədri Cefri Verbakın Azərbaycanın milli tar və kamança alətlərində muğam ifa etməsi böyük maraqla qarşılanıb.

Azərbaycanın istedadlı pianoçusu, respublika və beynəlxalq müsabiqələr laureatı Fəqan Həsənlinin solo ifasında Üzeyir Hacıbəylinin “Cəngi”, Firəngiz Əlizadənin “Sonata” və digər əsərlər səslənib.

Bəstəkar İlahə İsrafilovanın Amerikada premyerası baş tutan “The world of Nasimi” kompozisiyası dinləyicilər tərəfindən alqışlarla qarşılanıb.

Həmçinin tədbirdə amerikalı soprano Shenika John Jordan tərəfindən Nəsiminin qəzəlləri və onun qəzəllərinə yeni yazılmış romanslar və N.Əliyarovanın ifasında “Yeddi gözəl” baletindən parça, F. Sücəddinovun “Vətən” balladası və s. əsərlər səsləndirilib.

Qeyd edək ki, Nyu-Yorkda Azərbaycanın dahi şairi Nəsiminin 650 illik yubileyinə həsr olunmuş konsert proqramının keçirilməsi mədəniyyətimizin geniş arenada təbliği istiqamətində atılmış əlamətdar hadisələrdəndir.

Firuzə ALİMOVA

 

Bir cavab yazın