“Ermənistanın Qarabağ müharibəsində məğlub olması, qoşunlarının Azərbaycandan çıxarılmasına razı olması ilə nəticələndi. Bu, bütün Cənubi Qafqaz üçün böyük bir dərs oldu ki, hər hansı bir məsələ yalnız sülh yolu ilə həll olunmalıdır”.

KONKRET.az xəbər verir ki, bu sözləri məşhur rus rejissoru, Rusiyanın Xalq artisti, “Mosfilm”in baş direktoru Karen Şahnazarov VGTRK radio holdinqinin direktoru Georgi Saralidzenin “Solovyov LIVE” kanalının efirində söyləyib.

Şahnazarov vurğulayıb ki, müharibənin yenidən başlamaması üçün Ermənistan siyasətini çoxdan dəyişdirməli idi. “Dedim ki, bir uzlaşma tapmaq lazım idi, Azərbaycanın ərazi bütövlüyü problemini və Qarabağ ermənilərinin yaşaması və qorunması problemini tanımaq və bu əsasda məsələləri həll etmək lazımdır. Mənə elə gəlir ki, erməni cəmiyyətinin siyasi elitası vəziyyəti səhv qiymətləndirdi.

Müharibənin bitməsi, rejissorun dediyi kimi, bir çox insanın həyatını xilas edir. “Atəşin dayandırılması öz-özlüyündə yaxşıdır. Etiraf etmək lazımdır ki, Azərbaycanın hərbi uğurları var. Azərbaycan bu dəfə daha güclü oldu. Bu anlaşma həm Qarabağ ermənilərini, həm də Ermənistanı xilas edir. Məğlubiyyət həmişə çox acı olur. Amma güc tapmalıyıq Cənubi Qafqazda uzunmüddətli bir sülh yaratmaq üçün. Çünki bu həm Azərbaycanın, həm də Ermənistanın inkişafının bir zəmanətidir. Yaxşı ki, Ermənistan və Dağlıq Qarabağ gəncliyini sobaya atmağı dayandırdılar, yeri gəlmişkən, ölənlərin əsas hissəsi Qarabağlılardır”.

Nikol Paşinyanın təslim olması, hökm sürən reallıqların etirafı və lazımi qərardan başqa bir şey deyildi. “Mən cənab Paşinyanın pərəstişkarı deyiləm və heç vaxt olmamışam, amma Paşinyan realist davranıb. Bu vəziyyətdə yeganə çıxış yolu bu idi – etiraf etməliyəm. Ermənistan rəhbərliyini dəyişdirib dəyişdirməyəcəyini bilmirəm, amma bunu duyğularla etməməliyik. Nəticədə minlərlə, yəqin ki, on minlərlə erməni gəncinin, eyni zamanda azərbaycanlı gənclərin həyatını xilas oldu”, – deyə “Mosfilm “in baş direktoru vurğulayıb.

Karen Şahnazarov Ermənistanı Azərbaycanla müharibədən sonrakı münasibətlərin daha tez qurulmasına çağırdı. “Mənə elə gəlir ki, bu Cənubi Qafqaz üçün böyük bir dərsdir: müharibələrə ehtiyac yoxdur, hər şey sülh yolu ilə həll olunmalıdır. Müqavilə Ermənistanla Azərbaycan arasında gələcək əməkdaşlığı nəzərdə tutur və bunun üçün irəli getməliyik. İndi revanşizmə ehtiyacımız yoxdur. Ən əsası, erməni xalqında belə bir məğlubiyyət hissi var. Özümdə bunu dəf etdim. Çünki özümüzdə güc tapmalıyıq, əməkdaşlıq etməliyik. Əminəm ki, Cənubi Qafqaz – Azərbaycan, Gürcüstan və Ermənistan – birlikdə yaşamaq üçün düzgün və yeganə forma tapa bilər: Qafqazlılar arasında əsrlər boyu  qarşılıqlı yardım və dostluq olub”.

Surxay Atakişiyev,

KONKRET.az