Böyük Britaniyanın keçmiş baş naziri Marqaret Tetçerin mükafatlarından birinin satışı ilə bağlı elan əntiq əşyaların satışı ilə məşğul olan “Peter Harrinqton” şirkətinin saytında yer alıb.
KONKRET.az xəbər verir ki, bu mükafat “Dəmir ledi”nin 2001-ci ildə Nursultan Nazarbayevin əlindən şəxsən aldığı “Dostuk” ordenidir. Piter Harrinqton 1995-ci ildə təsis edilmiş mükafatın yeddinci qalibi olduğunu açıqlayır.
Qeyd edək ki, Marqaret Tetçerə məxsus “Dostuk” ordenini 12500 funta (təxminən 7,8 milyon tenge) ala bilərsiniz. Mükafatın vəziyyəti aşağıdakı kimi təsvir olunur:
“Döş ulduzu qiymətli daşlarla çiyin lentindəki orden nişanı ilə birlikdə mavi parça ilə örtülmüş, ağ atlazla üzlənmiş, rus dilində “Dostluq” yazısı olan orijinal qutuda kral mavi məxmər astarda təqdim edilmişdir. Mükafat azacıq köhnəlib, qutunun alt hissəsində bir neçə cızıq var, amma ümumilikdə vəziyyət çox yaxşıdır.”
Xatırladaq ki, Marqaret Tetçer Nursultan Nazarbayevlə ilk dəfə o, Böyük Britaniyanın baş naziri postunu tərk etdikdən qısa müddət sonra – 1991-ci ildə görüşüb.
“Avqustun 31-də Böyük Britaniyanın keçmiş baş naziri Tokioda mühazirə oxumağa gedərkən Almatıda dayanıb. Nazarbayev qonağına Qazaxıstanda mühüm dəyişikliklər barədə məlumat verib. O, Tetçerə respublikasının azad bazar iqtisadiyyatına doğru irəliləməsindən danışıb və əlavə edib ki, bir neçə gün əvvəl o, Sovet İttifaqının Siyasi Bürosundan istefa verib… “Cənab prezident, deyəsən, siz kommunizmdən tetçerizmə keçirsiniz”. Dəmir Ledi ona hökumətlərinin özəlləşdirmə siyasəti haqqında danışaraq belə deyib.
Şirkətin saytı görüşün şahidlərindən birinə istinadən xəbər verir.
Nazarbayevin özü Tetçerin səfərləri barədə danışıb, onunla Semipalatinsk poliqonunun bağlanması mövzusunu müzakirə etdiyini qeyd edib.
“Dəmir ledi” özü də 1991-ci ildən sonra da Nazarbayev haqqında müsbət fikirlər səsləndirib.
“Dövlətlərin “qurucuları” demək olar ki, həmişə qeyri-adi şəxsiyyətlər olur və Nursultan Nazarbayev də bu kateqoriyaya aiddir. Prezident Nazarbayev Qazaxıstanı bugünkü vəziyyətə gətirmək üçün cəsarət və ehtiyatlılığın birləşməsindən istifadə edib. Kommunizm buxovlarını ataraq, ölkə özünün xüsusi qazax xüsusiyyətlərini saxlayıb. Prezident Nazarbayev açıq iqtisadiyyat və cəmiyyətə can atıb, bəzi qonşuları bunu qəti şəkildə rədd edib və o, beynəlxalq təşkilatlarda Qazaxıstan üçün əhəmiyyətli etibar qazanıb”.
Düzdür, sitatın orijinal mənbəyi TASS-da göstərilməyib. Tetçer o vaxta qədər üç il idi ki, ölmüşdü.
Natiq Səlim,
KONKRET.az