Dörd il əvvəl silahlı qüvvələrimiz Ermənistan ordusunu darmadağın etdikdən sonra Azərbaycan əsgərinin gücü hər kəsə bəlli oldu. O da bəlli oldu ki, müasir silahlarla təhciz edilən Azərbaycan ordusu istənilən döyüş tapşırığını yerinə yetirmək gücündədir. Elə buna görə də, dünya reytinq cədvəlində Azərbaycan ordusu 29-cu yerə yüksəlib. Bəs orduların reytinq cədvəli hansı kateqoriyalar üzrə aparılır?
KONKRET.az-ın suallarını cavablandıran hərbi ekspert Səxavət Məmməd bildirdi ki, burada əsasən ölkə əhalisinin sayı nəzərə alınır:
“Daha sonra ehtiyat qüvvələr, xidmətdə olan personalın və xidmətə yararlıların sayı əsas götürülür. Bundan sonra ordunun tərkibindəki qoşun növlərinə görə reytinq müəyyən edilir. Həm döyüş texnikalarının, həmçinin tankların, təyyarələrin, raketlərin sayı da önəmli rol oynayır. Bütün bunların hamısı hesablanaraq konkret reytinq çıxarılır”.
Daha sonra Azərbaycan ordusunun reytnq cədvəlində irəlləməsindən danışan ekspert bildirib ki, buna səbəb ölkə rəhbərinin bəzi açıqlamaları və alınan yeni hərbi texnikalardır:
“Prezident İlham Əliyev bir neçə dəfə açıqlama verdi ki, Azərbaycan ordusunun tərkibində xüsusi təyinatlılar, komando bölmələrinin sayı artırılır və ordu inkişaf edir. Bundan əlavə, Azərbaycan ordusu Çexiyadan “Tida” haubitsaları, Pakistandan JF-17C qırıcı təyyarələri alıb. Bunların hamısı Azərbaycan ordusunun reytinqinə təsir edir. Əslində bir çox insanlar elə düşünür ki, reytinq cədvəli ordunun həm də döyüş qabiliyyətini göstərir”.
Səxamət Məmməd əlavə edib ki, bəzən reytinqi izləyən insanlarda belə bir təəssürat yaranır ki, bəzi göstəricilərə görə filan ölkə başqasını yenə bilər. Onun sözlərinə görə əslində bu belə deyil:
“Bu reytinq cədvəli sadəcə olaraq saylara görə nəzərdə tutulur. Reytinq cədvəlində heç vaxt ordunun döyüş qabiliyyəti qətiyyən nəzərdə tutulmur. Məsələn ABŞ-nin döyüş qabiliyyətinə və ordunun reytinqinə fikir verin. Eyni zamanda Əfqanıstanın da reytinqinə baxın. Amerika Əfqanıstanda istədiyinə nail ola bilmədi və oranı tərk etdi. İndiki dönəmdə Rusiyanın və Ukraynanın reytinqinə diqqət edin. Reytinqə görə Rusiya bir neçə dəfə Ukraynadan güclüdür. Amma müqavimət məsələsi tamamilə fərqlidir. Ümumiyyətlə kiçik dövlətlər həmişə çalışırlar ki, müharibələrdə böyük dövlətlərə daha çox zərər versinlər. Bu da həmişə böyük dövlətlər üçün problem yaradır”.
Daha sonra Azərbaycan ordusunun inkişafından danışan ekspert, Silahlı Qüvvələrin döyüş hazırlığına ciddi fikir verildiyini bildirib:
“ Azərbaycan ordusunun inkişafı, orduya dövlətin yanaşması da göz qabağındadır. Azərbaycan maksimum ordunu inkişaf etdirməyə çalışır. Hətta parlamentdəki çıxışı zamanı Prezident İlham Əliyev bildirdi ki, bizim bir nömrəli hədəfimiz ordunun inkişafıdır. Əvvəl Azərbaycanın əlində silahlar və aviavasitələr var idi. İndi hərbi arsenalımıza Pakistandan alınan JF-17C-lər əlavə olunanda Azərbaycanın reytinqinə təsir etdi və ölkəmizi bir neçə pillə qabağa atdı. Reytinq cədvəlində irəlləmə yaxşı göstəricidir. Amma reytinq cədvəli aldadıcı olmamalıdır”.
Vəli Həsənoğlu,
KONKRET.az