Bu gün Qaradağ rayonunun Lökbatan qəsəbəsində “Azərbaycan tarixinin şanlı səhifələrini qanı ilə yazanlar” layihəsi çərçivəsində şəhid ailələri və rayon ictimaiyyətinin nümayəndələri ilə Novruz bayramı münasibətilə görüş keçirilib.
KONKRET.az xəbər verir ki, tədbir Qaradağ Rayon İcra Hakimiyyəti, Yeni Azərbaycan Partiyası Qaradağ Rayon Təşkilatı, Gənc Politoloqlar Mərkəzinin təşkilatçılığı və Azərbaycan Respublikasının Qeyri-Hökümət Təşkilatlarına Dövlət Dəstəyi Agentliyinin maliyyə dəstəyi ilə baş tutub.
Tədbirdə Qaradağ RİH başçısının müavini Təranə İsmayılova, Yeni Azərbaycan Partiyası Qaradağ Rayon Təşkilatının sədri Qafar Əliyev, millət vəkilləri Aydın Hüseynov və Səbinə Xasayeva, Qeyri-Hökümət Təşkilarlarına Dövlət Dəstəyi Agentliyinin əməkdaşı Ülkər Süleymanova çıxış edərək, Vətən müharibəsində böyük qələbəmizin əldə edilməsində Prezident İlham Əliyevin əvəzsiz xidmətlərindən bəhs ediblər. Həmçinin, torpaqlarımızın 30 illik işğalına son qoyaraq canlarından və sağlamlıqlarından keçən şəhid və qazilərimizi ehtiramla yad ediblər. Tədbirdə söz verilən şəhid ailələrinin üzvləri – Fəridə İsmayılova, Leyla Musayeva, Pakizə Abbasova, Nizami Hüseynov və başqaları qəhrəman Vətən övladlarından qürurla danışaraq, dövlət tərəfindən göstərilən diqqət və qayğıya görə minnətdarlıqlarını ifadə ediblər.
Daha sonra tədbir bədii hissə ilə davam etdirilib. Qaradağ rayonu Ələt qəsəbəsi 302 saylı orta məktəbin və Qaradağ Rayon Mədəniyyət Sarayının bədii özfəaliyyət kollektivinin nümayəndələri tərəfindən şeirlər söylənib, mahnılar oxunub və ədəbi-bədii kompozisiyalar nümayiş etdirilib.
Tədbir iştirakçılarına, həmçinin, layihə çərçivəsində nəşr olunan “Qaradağ rayon üzrə İkinci Qarabağ – Vətən Müharibəsi Şəhidlərimiz “ adlı kitabça paylanıb. Kitabçada 44 günlük Vətən müharibəsi zamanı həlak olmuş Qaradağ rayon ərazisində yaşayan şəhidlərimiz haqqında qısa məlumat verilir.
Sonda tədbir iştirakçıları ilə xatirə şəkilləri çəkdirilib.
Qeyd edək ki, sözügedən layihə çərçivəsində növbəti tədbirlərin Qaradağ rayonunun Sahil, Qobustan və Ələt qəsəbələrində keçirilməsi nəzərdə tutulur.
Sevinc Paşayeva,
KONKRET.az
