İsveçin “Nordic Monitor” saytı Türkiyə hərbi rəhbərliyinin Ermənistana hücum planlarını təsdiqləyən məxfi materialları dərc edib.
KONKRET.az bildirir ki, saytın sərəncamında Türkiyə Baş Qərargahının 23 may 2016-cı il tarixli, Ermənistana qarşı hərbi əməliyyatlar proqramına aid daxili yazışmalarının surəti var. Sənəddə “Oğuztürk” adlı bir hərbi əməliyyatın planlaşdırıldığı deyilir. Bütün əməliyyata Altay kod adı verilmiş və hələ 2001-ci ildə təsdiq edilibmiş.
Ümumi sənəddən fərdi səhifələrin itirilməsi faktı 4 may 2016-cı ildə Ankaradakı “Əkinçi” hava bazasında sənədlərin yoxlanılması zamanı aşkar edilibmiş. Məlumatın sızmasına baxmayaraq, bu sənədin qüvvədə qaldığı da deyilir.
Bu məlumatların etibarlılığı hələ bəlli olmasa da, bir şey aydındır: Türkiyə Ermənistana qarşı dəqiq bir hərbi əməliyyat strategiyasına sahibdir və həmişə də belə olub. Bu planın əsas müddəası Ermənistan Respublikasının strateji hədəflərinə zərbə vurmaqdır.
NATO-nun cənub qanadının əsas müttəfiqlərindən biri olan Türkiyə Soyuq Müharibə illərində SSRİ-nin Cənubi Zaqafqaziya hərbi bölgəsinə hücumların çatdırılmasında əsas körpü kimi qəbul edilmişdi. İndi Türkiyə ordusu Ermənistan-Türkiyə sərhədində dayanır və təbii ki, istənilən ordu kimi, Ermənistana münasibətdə həm hücum, həm də müdafiə strategiyasına malikdir. Ermənistanın sərhədində Türkiyənin qərargahı Ərzincanda yerləşən üçüncü sahə ordusudur. Bu ordu hər an Ermənistana qarşı hərbi əməliyyatlara başlaya bilər.
Türkiyə ordusunun Ermənistanla bağlı hərbi strategiyasını həyata keçirmək yolunda əsas maneə əks tərəfdə yerləşən rus ordusu və arsenalı, potensialı tezliklə artacaq Gümrüdəki 102-ci hərbi bazadır. Unutmayaq ki, Ermənistan KTMT-yə üzvdür və ölkəyə qarşı təcavüz KTMT-yə və onun əsas dövləti – Rusiya Federasiyasına qarşı təcavüz kimi qəbul edilir. Bu, o deməkdir ki, əgər Türkiyə ordusu Ermənistana hava və ya başqa hücumlar edərsə, onda nüvə silahlı Rusiya Türkiyənin də üzvü olduğu NATO ilə baş-başa qala bilər.
Türkiyə Suriya və İraqda hərbi əməliyyatlar keçirir. Ancaq Suriya və İraq Rusiyanın himayəsində deyillər, heç KTMT üzvü də deyillər və Suriyanın şimalındakı kürdlərə qarşı həyata keçirilən hərbi əməliyyat Rusiya ilə neytral zona yaratmaq üçün razılaşdırılmışdı.
Türkiyənin Ermənistana hərbi təcavüzü Üçüncü Dünya Müharibəsinə səbəb ola bilər, çünki münaqişəyə avtomatik olaraq bir tərəfdən Rusiya, digər tərəfdən isə NATO qoşulacaq. Buna, ilk növbədə, NATO liderləri – ABŞ, Fransa, Böyük Britaniya və s. icazə verməyəcəklər, çünki bu halda onlar NATO nizamnaməsinin kollektiv təhlükəsizlik haqqında 5-ci maddəsindən irəli gələrək genişmiqyaslı hərbi münaqişəyə cəlb olunacaqlar.
Ermənistana hücum regional geosiyasi reallıqları dəyişəcək, Rusiyadan başqa İran, Çin və digər ölkələr də bunun əleyhinədirlər, çünki Ermənistanın Türkiyə ordusu tərəfindən mümkün işğalı Böyük Turan dövlətinin yaradılması üçün yol açmaq deməkdir və bu bir sıra ölkələrin ərazi bütövlüyünə və geosiyasi maraqlarına təhlükə yaradacaq.
Beləliklə, Türkiyə ordusunun Ermənistana qarşı hücum və müdafiə strategiyalarına olmasına baxmayaraq, onların həyata keçirilməsinə bir sıra amillər mane olur – Ermənistan ərazisində yerləşən Rusiya ordusu, Ermənistanın KTMT-yə üzvlüyü, Rusiya hərbi himayəsi, habelə NATO-nun bu məsələdə mənfi mövqeyi.