ABŞ Prezidenti Donald Tramp Vaşinqtonun İranla nüvə proqramı ilə bağlı “yaxşı danışıqlar” apardığını bəyan edib. O, gərgin vəziyyət fonunda amerikalı danışıqlar qrupunun fəaliyyətini yüksək qiymətləndirib və prosesin müsbət istiqamətdə davam etdiyini bildirib.

KONKRET.az xəbər verir ki, Tramp bu barədə Sülh Şurasının ilk iclasında çıxışı zamanı danışıb və İranla aparılan danışıqların hazırda əsas gündəm mövzularından biri olduğunu vurğulayıb.

ABŞ Prezidenti xüsusi nümayəndə Steven Uitkoff və kürəkəni **Jared Kushner**in danışıqlarda fəal iştirak etdiyini qeyd edib. Onun sözlərinə görə, onlar iranlı rəsmilərlə bir neçə uğurlu və məhsuldar görüş keçiriblər.

“Onların hazırda dünyanın ən həssas nöqtələrindən biri olan İranla bağlı çox maraqlı görüşləri olub. İran nümayəndələri ilə yaxşı münasibətlər qurublar. Danışıqlar müsbət məcrada gedir”, – deyə Tramp bildirib.

Prezident vurğulayıb ki, ABŞ və İran arasında ciddi və məzmunlu bir razılaşma əldə olunmalıdır. Əks halda, mənfi nəticələrin qaçılmaz ola biləcəyini istisna etməyib.

“Əgər real və əhəmiyyətli saziş əldə olunmasa, pis hadisələr baş verə bilər. Ola bilsin, əlavə addım atmalı olaq, ya da buna ehtiyac qalmasın. Bəlkə də razılaşma əldə edəcəyik. Yaxın 10 gün ərzində bu barədə məlumatınız olacaq”, – deyə o qeyd edib.

Tramp son illərin təcrübəsinin göstərdiyini bildirib ki, İranla həqiqətən effektiv razılaşma əldə etmək asan deyil. Onun sözlərinə görə, bu istiqamətdə hələ görüləsi çox iş var.

“Bizim İranla bağlı ciddi işimiz var. Onların nüvə silahına sahib olmasına yol verilə bilməz. Bu, onlara dəfələrlə açıq şəkildə bildirilib”, – deyə ABŞ Prezidenti əlavə edib.

Trampın açıqlamaları beynəlxalq mediada geniş rezonans doğurub və İranla bağlı danışıqların gələcək taleyinə dair gözləntiləri daha da artırıb.

Natiq Səlim,
KONKRET.az