Şəki Apellyasiya Məhkəməsində adam oğurluğuna cəhddə təqsirləndirilən İntiqam Nəbiyev və onun xalası oğlu Fikrət Quliyevin (hər iki şəxsin ad, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.

KONKRET.az pravdaaz-a istinadən xəbər verir ki, hakim Zamin Tahirovun sədrliyi ilə keçirilən prosesdə qərar elan olunub.

Qərara əsasən, apellyasiya şikayəti təmin edilməyib, Şəki Ağır Cinayətlər Məhkəməsinin hökmü təyin edilmiş cəza hissəsində dəyişdirilib. Belə ki, İntiqam Nəbiyevin cəzası 4 il müddətə azadlıqdan məhrumetmədən 3 ilə endirilib. Ona cəza çəkdiyi müddətdə məcburi ambulatoriya müşahidəsi və psixiatr müalicəsi şəklində tibbi xarakterli məcburi tədbirlər təyin edilib. Bu tədbirlər cəzа müddəti ərzində cəzаnı icrа edən Ədliyyə Nazirliyinin Penitensiar Xidmətin tərəfindən həyаtа keçiriləcək. Fikrət Quliyevin 2 il 11 ay 27 gün müddətinə azadlıqdan məhrumetmə cəzası isə 1 il 11 ay 27 günə endirilib.

İttihama görə, hadisə 14 fevral 2024-cü il tarixdə, saat 14 radələrində Qəbələ şəhəri ərazisində qeydə alınıb.

Belə ki, İntiqam Nəbiyev evlənmək məqsədi ilə aərərçəkmiş Sənubər Hacıyevanı (şərti) qaçırtmaq qərarına gəlib. O, xalası oğlu Fikrət Quliyevlə birgə Qəbələ Rayon Mərkəzi Xəstəxanasının yaxınlığında yolda qızın işə gedərkən qarşısını kəsib. Sonra İntiqam zərərçəkmişi xalası oğlunun idarə etdiyi “Opel Astra” markalı avtomobilinə zor tətbiq etməklə, yəni qucaqlayaraq və qolundan tutub əyləşdirib. Daha sonra Fikrət maşını idarə edərək hadisə yerindən uzaqlaşıb. Lakin ərazidə xidmət aparan və hadisə barədə məlumat alan Qəbələ Rayon Polis Şöbəsinin əməkdaşları tərəfindən Fikrətin idarə etdiyi maşın saxlanılıb.

Hər iki şəxs cinayət məsuliyyətinə cəlb edilib, İntiqam Nəbiyevin barəsində həbs, Fikrət Quliyevisə barəsində polisin nəzarəti altına vermə qətimkan tədbiri seçilib.