Ukrayna Prezidenti Volodimir Zelenski mayın 15-də Türkiyəyə səfər edəcək. O, Ankarada Türkiyə Prezidenti Rəcəb Tayyib Ərdoğanla görüşəcək və Rusiya Prezidenti Vladimir Putinlə birbaşa danışıqlara ümid edir.

KONKRET.az xəbər verir ki, Zelenski bildirib ki, yalnız Putinlə birbaşa görüş sülh razılaşmasına gətirib çıxara bilər və Rusiya liderinin danışıqlarda iştirakı müharibəni dayandırmaq istədiyinin göstəricisi olacaq. Əks halda, bu, əksini sübut edəcək.

Ukrayna tərəfi danışıqlardan əvvəl 30 günlük qeyd-şərtsiz atəşkəsin əldə olunmasını tələb edir. Avropa İttifaqı, Almaniya və ABŞ bu təşəbbüsü dəstəkləyir və əgər irəliləyiş olmazsa, Rusiyaya qarşı əlavə sanksiyalar tətbiq edilə bilər.

Kreml hələlik Putin və ya digər nümayəndənin danışıqlarda iştirakını təsdiqləməyib. Rusiya rəsmiləri danışıqların şərtsiz keçirilməsini istəyir və atəşkəs tələblərini qəbul etmir.

ABŞ Prezidenti Donald Tramp danışıqları dəstəkləyir və nümayəndələrini müşahidəçi kimi göndərib. O, Yaxın Şərq səfəri çərçivəsində Türkiyəyə gəlmək ehtimalını da istisna etmir.

Zelenskinin Ankaraya səfəri Türkiyənin vasitəçilik səylərini gücləndirir və Rusiya-Ukrayna münaqişəsinin diplomatik həllinə yeni ümidlər yaradır.

Natiq Səlim
KONKRET.az