“Zülm ilə abad olanın aqibəti bərbad olar”.

KONKRET.az xəbər verir ki, millət vəkili Nurlan Həsənov Ermənistandakı ağır sosial-siyasi durumla bağlı sosial şəbəkədəki hesabında paylaşım edib.

Açıqlamada deyilir:

“O vaxtlar 4-5 yaşım var idi, amma həç vaxt gözümün önündən getmir, Gəncədə yollarda tanklar hərəkət edirdi, Surət Hüseynov, cəbhəçilər, Qarabağda ağır itkilər, dərəbəylik… Hər an hər şey ola bilər qorxusu. Ermənistanda yaranmış bugünkü vəziyyət sanki Azərbaycanda 90-larda yaranan vəziyyəti xatırladır. Amma biz o vaxt şanslı idik. Çünki, bizim Heydər Əliyevimiz var idi və ölkəni düşdüyü ağrılı vəziyyətdən çıxara bilmişdi.

30 illik işğal bu gün isə Ermənistanın varlığına təhdid yaradır. Məşhur bir söz var “zülm ilə abad olanın aqibəti bərbad olar”. İndi əsl yerinə düşür. Ermənistanın varlığının təhdid altında olmasını artıq aparıcı erməni siyasətçilər də qəbul edir. Günahkar isə biz deyilik, tək Paşinyan da deyil. Günahkarlar bu işğalçı siyasəti başladan və davam etdirən bütün erməni siyasətçiləri, eyni zamanda bu işğalı dəstəkləyən, işğala göz yuman, səsini çıxarmayan bütün hər kəsdir.

İndi, bu ərəfələrdə Ermənistanda seçkilərdir. Paşinyan, Sarkisyan və ya Köçəryan bəlkə də heç fərqi olmayacaq, kim seçilir seçilsin, real vəziyyət Ermənistanda vətəndaş qarşıdurmasının hər an yarana biləcəyidir. Olmaya da bilər, amma baxırsan bütün namizədlər fərqli xarici dövlətlərin fiqurlarıdır, bunu da açıq-aydın hər kəs bilir, danışılmayan gerçəklərdir. Məsələn, Paşinyan kimin adamıdı və ya Köçəryanı kim dəstəkləyir, hər kəs bilir! Ermənilər şanssızdır, çünki onları xilas edə biləcək gerçək liderləri yoxdur.

Hər halda Ermənistandakı daxili siyasi proseslər nəticəsində ölkəmizin ərazi bütövlüyünə kiçik bir təhdid yaranarsa cavab artıqlaması ilə veriləcək. Dəmir yumruq yerindədir!”