Gəncə Apellyasiya Məhkəməsində insan alverində təqsirləndirilən Danyela Dəmirovanın (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.

KONKRET.az pravdaaz-a istinadən xəbər verir ki, hakim Salman Hüseynovun sədrliyi ilə keçirilən prosesdə qərar elan edilib.

Qərara əsasən, apellyasiya şikayəti təmin edilməyib.

İttiham aktına görə, Danyela Dəmirova tamah niyyəti ilə qadınları aldadaraq, onların zəiflik vəziyyətindən, eləcə də zor tətbiqetmə hədəsi və hədə-qorxu vasitələrindən istifadə etməklə cinsi istismar məqsədilə Azərbaycanın dövlət sərhədindən keçirib, insan alveri və insan alveri məqsədilə sənədlərlə qanunsuz hərəkətlər cinayətlərini təkrarən törədib.

Belə ki, o, 2024-cü ilin yanvar ayında tanışı olan zərərçəkmiş S.S.-i (adı, soyadı şərtidir) aldadaraq Türkiyənin Çanakkale şəhərində işlə təmin edəcəyini vəd edib. O, bu yolla zərərçəkmişi cinsi istismar məqsədilə dövlət sərhədindən keçirib, Çanakkale şəhərində kirayə mənzilə yerləşdirdikdən sonra zor tətbiq etmək hədəsi və hədə-qorxu vasitəsilə kişi müştərilərlə pul müqabilində görüşməyə məcbur edib.

Bundan başqa, təqsirləndirilən şəxs 2024-cü ilin avqust ayında eyni üsulla digər tanışı – zərərçəkmiş M.M.-i (adı, soyadı şərtidir) aldadaraq Türkiyənin Yalova şəhərində işlə təmin edəcəyini vəd edib, onu da cinsi istismar məqsədilə Azərbaycanın dövlət sərhədindən keçirib. Sonra Danyela zərərçəkmişi Türkiyədə yerləşdirdiyi mənzildə və müxtəlif otellərdə zor və hədə-qorxu tətbiqi ilə kişi müştərilərlə pul müqabilində görüşməyə məcbur edib.

Hadisədən sonra Danyela Dəmirova saxlanılaraq cinayət məsuliyyətinə cəlb edilib.

Gəncə Ağır Cinayətlər Məhkəməsinin hökmü ilə o, 9 il müddətinə azadlıqdan məhrum edilib.