Bolqarıstan 2027-ci ilin sonuna qədər Rusiya qazının alınmasını dayandırmaq niyyətindədir ki, bu da onun Macarıstan və Slovakiyaya tranzitini faktiki olaraq dayandıracaq.

KONKRET.az xəbər verir ki, bu barədə ölkənin energetika naziri Jeço Stankov məlumat verib.

“Aİ üzvü kimi Bolqarıstan öz hərəkətlərini Avropa qanunvericiliyi və siyasətinə uyğunlaşdırır, o cümlədən 2027-ci ilin sonunadək Rusiyanın enerji resurslarından mərhələli şəkildə imtina edir. Avropa 2028-ci ilin əvvəlinə qədər Rusiya qazından tamamilə imtina edəcək. Macarıstan və Slovakiya digər mənbələrdən yanacaq tədarükünü təmin edə biləcəyi üçün həssas vəziyyətdə qalmayacaq”, – nazir vurğulayıb.

Sentyabrın 19-da Avropa Komissiyasının sədri Ursula fon der Leyen AK-nin 19-cu anti-Rusiya sanksiyalar paketi ilə bağlı təkliflərini təqdim edib. Bunlara, digər məsələlərlə yanaşı, 2027-ci ilin yanvarından etibarən Rusiyanın LNG-nin Aİ-yə idxalına qadağa, həmçinin kriptovalyuta və banklara qarşı tədbirlər daxildir.

Müşviq Tofiqoğlu

KONKRET.az