Hamiləlik dövrü qadının həyatındakı ən vacib və həssas dövrlərdən biridir. Bu dövr ərzində bir çox fizioloji dəyişikliklər baş verir və bu dəyişikliklər bəzən qadının sağlamlığına və körpənin inkişafına təsir göstərə bilər. Hamiləlik zamanı yüksək qan təzyiqi, yəni hipertoniya, bu kimi problemlərdən biridir və həm ananın, həm də körpənin sağlamlığını təhdid edə bilər.

Yüksək qan təzyiqi hamiləlikdə preeklampsiya, inkişaf geriliyi, erkən doğuş və digər ciddi nəticələrə yol aça bilər. Bu səbəbdən, hamiləlikdə qan təzyiqinin izlənməsi çox önəmlidir. Həkimlər, hamilə qadınları yüksək təzyiqin qarşısını almaq və ya idarə etmək üçün müntəzəm olaraq müayinədən keçirirlər, çünki erkən müdaxilə körpənin sağlamlığı üçün həyati əhəmiyyət kəsb edə bilər.

KONKRET.az bu mövzunu dərindən araşdırıb. Hamiləlik dövründə qan təzyiqinin yüksək olmasının səbəbləri, təsirləri və qarşısının alınması yolları haqqında önəmli nüansları təqdim edirik:

Preeklampsiya riski: Yüksək qan təzyiqi, preeklampsiya adlanan bir vəziyyətə yol aça bilər. Bu, hamiləlik dövründə qan təzyiqinin artması və orqanlarda zərərli təsirlər yaratmasıdır. Preeklampsiya, körpənin oksigen və qidalanma almasını məhdudlaşdıra bilər.

Körpədə inkişaf geriliyi: Yüksək qan təzyiqi, uşağa gedən qan axını və oksigenin azaldılması ilə əlaqəli ola bilər, bu da körpənin böyüməsini yavaşladır və inkişafında gerilik yarada bilər.

Erkən doğuş riski: Yüksək qan təzyiqi, preterm doğum riskini artıra bilər, yəni körpə normaldan əvvəl doğula bilər. Bu vəziyyət, körpənin doğumdan sonra inkişaf problemləri ilə üzləşməsinə səbəb ola bilər.

Plasenta ayrılması: Yüksək qan təzyiqi, plasentanın erkən ayrılmasına səbəb ola bilər ki, bu da körpənin oksigen almasını və qidalanmasını təsir edir, bəzən həyat üçün təhlükəli ola bilər.

Hamiləlik dövründə yüksək qan təzyiqi, ailə üzvlərində hipertoniya olan qadınlarda daha çox rast gəlinir. Genetik meyil bu vəziyyətin yaranmasına təsir edə bilər. 35 yaşdan yuxarı olan qadınlar, hamiləlik zamanı yüksək qan təzyiqi inkişaf etdirmə riskini daha çox daşıyır. Stress və emosional gərginliklər də qan təzyiqini yüksəldə bilər. Hamiləlik dövründə psixoloji dəyişikliklər, bəzi qadınlarda təzyiq artımına səbəb ola bilər.

Belə vəziyyətin qarşısını almaq üçün bir neçə önəmli məqamlara diqqət etmək vacibdir. Onlardan biri və ən önəmlisi qidalanma tərzidir. Hamiləlik dövründə balanslı və düzgün qidalanmaq çox vacibdir. Az duzlu, təzə meyvə və tərəvəzlə zəngin, təbii və təzə qidalar, həmçinin protein və vitaminlərlə zəngin yeməklər qan təzyiqini normada saxlamağa kömək edər.

Hamiləlik zamanı yüngül idman hərəkətləri (gəzinti, yoga və ya üzgüçülük) qan dövranını tənzimləyərək təzyiqin normal səviyyədə qalmasına kömək edə bilər. Amma fiziki aktivlikdə həkim tövsiyələrinə uyğun hərəkət etmək vacibdir.

Normal çəki artımına diqqət yetirmək çox önəmlidir. Artıq çəki və obezite, yüksək qan təzyiqinin yaranmasına səbəb ola bilər. Kilo artımını izləmək və sağlam bədən çəkisini qorumaq, hipertoniya riskini azaldır. Bundan əlavə, hamiləlik boyunca qan təzyiqinin müntəzəm olaraq ölçülməsi, yüksək təzyiqin erkən aşkar edilməsinə və müvafiq tədbirlərin görülməsinə imkan verir. Həmçinin, yuxusuzluq da qan təzyiqini artıran faktorlar arasındadır. Yaxşı yuxu, bədənin və ürək-damar sisteminin rahatlamasına kömək edir.

Unutmayaq ki, hamiləlikdə yüksək qan təzyiqinin qarşısının alınması və müalicəsi həm ananın, həm də körpənin sağlamlığı üçün çox əhəmiyyətlidir. Həkim müayinələri və sağlam həyat tərzi bu problemi minimuma endirmək üçün ən yaxşı yollardır./yenisabah