“Dörd il ərzində həyata keçirilən gizli proqramın son mərhələsindəyik”.
KONKRET.az xəbər verir ki, bunu Yerevan.Today saytının baş redaktoru Sevak Akopyan öz Facebook səhifəsində yazıb.
“Dekabrın 16-sı ərəfəsində Nikol Paşinyan Böyük Britaniyanın Gizli Kəşfiyyat Xidmətinin rəhbəri Riçard Murla görüşüb. Bir həftə əvvəl Ermənistan Təhlükəsizlik Şurasının katibi Armen Qriqoryan da eyni şəxslə görüşüb. Niyə və hansı məqsədlə məlumat verilmir.
Sadəcə protokol mətni var – “Cənubi Qafqaz regionunda baş verən proseslərlə bağlı məsələlər, həmçinin regional və beynəlxalq təhlükəsizliklə bağlı mövzular müzakirə olunub”.
Onların əslində nədən danışdıqları yəqin ki, aydındır. Çətin ki, Mİ6 xidmətinin rəhbəri beynəlxalq təhlükəsizliklə bağlı məsələlərdə Paşinyanla məsləhətləşmək istəyib.
Əgər aydın deyilsə, bir neçə sözlə Riçard Murun kim olduğunu izah edəcəyəm. 2014-2018-ci illərdə Böyük Britaniyanın Türkiyədəki səfiri olub, 1987-ci ildən xüsusi xidmət orqanlarında çalışır. Deyirlər ki, Rəcəb Ərdoğanın dostudur, həm də Əliyevə yaxındır. Türk dilində səlis danışır.
2016-cı ildə Türkiyədə dövlət çevrilişinə cəhd olanda Ərdoğana ilk dəstək verən o olub. Onun “Boz Qurdlar” terror qruplaşmasının yaranmasında kifayət qədər mühüm rol oynadığına dair sübutlar var. Türkiyənin xüsusi kəşfiyyat xidmətinin inkişafında Murun da rolu böyükdür.
44 günlük müharibədə Azərbaycanın qələbə qazanmasında Böyük Britaniyanın oynadığı rol müharibə dövründə yazılıb. Təkcə onu qeyd edim ki, Azərbaycanda 500-dən çox Britaniya şirkəti fəaliyyət göstərir, Böyük Britaniya Azərbaycan iqtisadiyyatına rəsmi olaraq 30 milyard dollardan çox sərmayə qoyub.
Xüsusilə müharibədən sonra faktlar dərc olunur ki, Böyük Britaniya da Qarabağda fəaliyyət göstərən yataqlara “gözünü dikib”. Məlum olur ki, azərbaycanlılar artıq Kaşeni və Drombonu Britaniya şirkətinə satıblar. Laçının həyat yolunun bağlanması isə məhz bu mədənlərlə bağlıdır.
Məhz bu günlərdə Britaniya kəşfiyyat xidmətinin rəhbəri Riçard Mur Ermənistana gəlib və Nikol Paşinyanla görüşlər keçirib.
Buna Nikol Paşinyanın iyulun 15-də ABŞ Mərkəzi Kəşfiyyat İdarəsinin rəhbəri Uilyam Börnslə görüşünü də əlavə edək. Məlum olar ki, biz yəqin ki, 4 ildir davam edən gizli proqramın son mərhələsindəyik və hər kəs artıq açıq kartlarla oynayır.
Fikrimcə, bu illər ərzində diqqətlə hazırlanmış plan başa çatmaq üzrədir. Gizlədəcək heç nə olmadığından bu planın davamlı şəkildə həyata keçirilməsi üçün məhz vaxtında mütəmadi görüşlər keçirilir. Və bu günə qədər heç bir istisna olmayıb.
P.S. Britaniya və ya Amerika kəşfiyyat orqanlarının rəhbərlərindən heç birinin əvvəllər Ermənistana gəldiyini xatırlamıram”, – deyə Akopyan yazıb.
Xuraman Etibarlı,
KONKRET.az