Bu il Azərbaycanda pomidor məhsuldarlığı əvvəlki illərlə müqayisədə xeyli yüksəkdir. Mövsümə uyğun olaraq bazarlarda bolluq müşahidə olunur və qiymətlər də rekord səviyyədə ucuzlaşıb. Lakin buna baxmayaraq, alıcı qıtlığı fermerləri ciddi çətinliklə üz-üzə qoyub. Bəs, pomidorun bu qədər ucuzlaşmasının əsas səbəbi nədir?

İqtisadçı Cəfər İbrahimli KONKRET.az-a açıqlamasında bildirib ki, bazarda müşahidə olunan qiymət enməsi əsasən mövsümi faktorlarla və məhsul bolluğu ilə bağlıdır.

Onun sözlərinə görə, hazırda açıq havada yetişdirilən pomidorların əsas satış dövrüdür və bu il məhsuldarlıq xüsusilə yüksək olub:

“Fermerlər təsdiqləyirlər ki, bu il məhsul boldur. Lakin bu da satışda çətinliklər yaradıb. Bütün regionlarda fermerlər məhsulu bazara çıxarmaqda çətinlik çəkdiklərini deyirlər. Bazarda təklif həddindən artıq artıb. Mövsüm olduğu üçün məhsulu nə tarlada saxlamaq mümkündür, nə də uzun müddət soyuducuda. Məcbur olaraq bazara çıxarılır”.

Cəfər İbrahimli əlavə edib ki, bu cür problemlərin qarşısını almağın əsas yolu kənd təsərrüfatı məhsullarının emal sənayesinin inkişaf etdirilməsidir:

“Hazırda bu məhsulla işləyən emal müəssisələri də pomidor qəbul etmir. Ehtimal olunur ki, onların anbarları artıq doludur. Bu səbəbdən yeni məhsulun emalı dayanır. Bu cür vəziyyətlər davamlı olaraq təkrarlana bilər. Ona görə də emal sənayesi inkişaf etdirilməlidir ki, məhsul tarlada məhv olmasın və bazardakı təzyiq azalsın”.

Beləliklə, hazırda pomidorun ucuzlaşmasının əsas səbəbi, təklifin normadan artıq olması və satış kanallarının yüklənməsi ilə bağlıdır. Tələb-təklif balansı pozulub və nəticədə fermerlər iqtisadi zərərlə üzləşirlər.

Aynurə İsmayıl

KONKRET.az