İranda sosial-siyasi gərginlik fonunda etiraz aksiyaları yeni mərhələyə keçib.

KONKRET.az-ın nocomment.az-a istinadən məlumatına görə, ölkənin Lorestan əyalətində yerləşən Kuhdəşt şəhərində etirazçılar şəhər mərkəzinə nəzarəti ələ keçiriblər.

Şahidlərin bildirdiyinə görə, etirazçılar əsas küçələrdə tonqallar yandıraraq şəhər həyatını faktiki olaraq iflic vəziyyətinə salıblar. Aksiya iştirakçıları açıq şəkildə antihökumət şüarları səsləndirib, o cümlədən İranın ali dini liderinə qarşı sərt çağırışlar edilib. Küçələrdə “Xameneyiyə ölüm olsun!” şüarlarının səsləndiyi qeyd olunur.

Hadisələr zamanı şəhərdə təhlükəsizlik qüvvələrinin fəaliyyəti məhdudlaşıb, bəzi ərazilərdə isə onların ümumiyyətlə görünmədiyi bildirilir. Sosial şəbəkələrdə yayılan görüntülərdə yanan tonqallar, qapadılan yollar və kütləvi toplaşmalar açıq şəkildə əks olunur.

Hazırda rəsmi qurumlar tərəfindən Kuhdəştdə baş verənlərlə bağlı ətraflı açıqlama verilməyib. Lakin müşahidəçilər hesab edirlər ki, bu hadisə ölkə üzrə etiraz dalğasının daha da dərinləşdiyini göstərir. Son aylarda İranın müxtəlif şəhərlərində sosial-iqtisadi problemlər, siyasi narazılıqlar və hakimiyyətə qarşı etimadsızlıq fonunda etirazlar mütəmadi xarakter alıb.

Ekspertlərin fikrincə, Kuhdəştdə şəhər mərkəzinin etirazçılar tərəfindən ələ keçirilməsi İran daxilində narazılığın miqyasının artdığını və proseslərin nəzarətdən çıxmaq təhlükəsi yaratdığını göstərən ciddi siqnaldır. Hadisələrin necə inkişaf edəcəyi və təhlükəsizlik qüvvələrinin buna hansı formada cavab verəcəyi isə yaxın saatlarda aydınlaşacaq.