“Ermənistanın Azərbaycanla tezliklə sülh müqaviləsi bağlamaq üçün siyasi iradəsi var”.

KONKRET.az xəbər verir ki, bu barədə Ermənistanın xarici işlər naziri Ararat Mirzoyan Azərbaycanın xarici işlər naziri Ceyhun Bayramov və ABŞ dövlət katibi Antoni Blinkenlə Vaşinqtonda görüşündən sonra sosial şəbəkədə yazıb.

Erməni diplomatiyasının rəhbəri bu sazişin Cənubi Qafqazda davamlı sülh və sabitliyin bərqərar edilməsinə yönələcəyinə ümid etdiyini bildirib.

Yayılan məlumatlarda deyilir ki, Vaşinqtonda keçirilən NATO sammiti çərçivəsində keçirilən üçtərəfli görüşdən sonra İrəvan və Bakı “sülh və dövlətlərarası münasibətlərin qurulması haqqında tarixi müqavilə”nin bağlanması istiqamətində irəliləyişi qeyd ediblər. Tərəflər bu istiqamətdə işi davam etdirmək barədə razılığa gəliblər.

Qeyd edək ki, iyunun 7-də Ermənistan Xarici İşlər Nazirliyi bir ay ərzində “Ermənistan Respublikası ilə Azərbaycan Respublikası arasında sülh və dövlətlərarası münasibətlərin qurulması haqqında” saziş imzalamağa hazır olduğunu bildirib.

Natiq Səlim,

KONKRET.az