“Paşinyan ya Ermənistanın ölüm hökmünü imzalamalıdır, ya da istefası ilə bağlı kağıza imza atmalıdır”.
KONKRET.az xəbər verir ki, bunu mayın 25-də Ermənistan parlamentinin iclasında müxalifətçi deputat, Ermənistan Respublika Partiyasının üzvü Ayk Mamicanyan bildirib.
“Baş nazir Nikol Paşinyanın yalnız iki yolu qalıb: ya Ermənistanın ölüm hökmünü imzalamaq, ya da özünün istefası”, – erməni siyasətçi deyib.
Onun sözlərinə görə, Nikol Paşinyan Qarabağla bağlı artıq edəcəyini edib və deyəcəklərini deyib.
“İndi növbə bizdədir – erməni xalqında. Ermənistan əhalisinin 90%-dən çoxu Qarabağın Azərbaycana birləşdirilməsini qeyri-mümkün hesab edir”, – Mamicanyan əlavə qeyd edib.
O, son 5 ildə komandasının Qarabağı “təslim edənləri aradan götürə bilmədiyi üçün” həmyerlilərindən üzr istəyib.
“Bəlkə də imkanlarımız xaricində daha çox səy göstərməli idik və bunu edəcəyik”, – deyə o əmin edib.
Xuraman Etibarlı,
KONKRET.az