“Bu gün Rusiyanın TASS agentliyi İlham Əliyevdən və Nikol Paşinyandan müsahibə aldılar. Müsahibədə hər ikisinə demək olar ki, eyni suallar ünvanladılar. Müsahibələrdə əsas bilmək istədikləri iki məqam vardı: 1. Tərəflərin sülhməramlı qüvvələrin bölgədə yerləşdirilməsinə münasibətləri və 2. Rusiyanın rəhbərliyi ilə Moskvada növbəti görüşün keçirilməsinə münasibətləri. Bu müsahibələrin məqsədi prosesi Moskvanın nəzarətinə keçirməkdir”.

KONKRET.az-ın xəbərinə görə, bunu siyasi fəal Azər Qasımlı deyib.

“Aydın idi ki, hər iki tərəf görüşə yox deməyəcəklər. Çünki bu həftənin cümə günü ABŞ dövlət katibi Mayk Pompeo bizim və erməni xarici işlər nazirlərini danışıqlara dəvət edib. Bir sözlə məsələmiz geopolitik maraqlar və rəqabətin aktiv mərhələsinə qədəm qoydu. Bu gün də BMT Təhlükəsizlik Şurasının qapalı iclasında müzakirəyə çıxarılacaq. Lakin bu iclasda hər hansı ciddi qərarı gözləməyə dəyməz. Diplomatlarımız möhkəm olmalıdılar. Əlimiz güclüdür. Bu səfər həm beynəlxalq hüquq, həm hərb meydanında, həm müttəfiqlər baxımından vəziyyət bizim xeyrimizədir. ABŞ, Britaniya və Avropa Birliyi Ermənistanı dəstəkləmir və məsələnin “ərazi bütövlüyü və sərhədlərin toxunulmazlığı” hüququ əsasında həllinin tərəfdarıdır. Ermənistanın bütün hərbi qüvvələri işğal olunmuş ərazilərdən, bir sözlə Azərbaycandan çıxmalıdır. Tək 7 rayon deyil (ikisini artıq azad etmişik!), Şuşa da dərhal bizə qaytarılmalıdır. Digər məsələləri isə sonra danışmaq olar. İşğal olmasa sülh olar!” – A.Qasımlı qeyd edib.