Səhər yeməyinin ayrılmaz hissəsi sayılan zeytun və pendir illərdir bir araya gələn klassik ikili kimi tanınır.Lakin mütəxəssislər bu birləşmənin göründüyü qədər sağlam olmadığını bildirirlər.

KONKRET.az milliaz-a istinadən xəbər verir ki, onların fikrincə, zeytun və pendiri eyni vaxtda istehlak etmək həzm və ürək-damar sisteminə ciddi zərər vura bilər.

Qidalanma üzrə mütəxəssislər qeyd edirlər ki, həm zeytun, həm də pendir adətən duzlu suda hazırlanır. Bu isə orqanizmdə natrium səviyyəsini artırır və böyrəklərə əlavə yük yaradır. İngiltərədə fəaliyyət göstərən diyetoloq Dr. Hannah Lister “Nutrition Daily” jurnalına bildirib:

“Zeytun və pendiri birlikdə yemək bədənə artıq duz yükləmək deməkdir. Bu, qan təzyiqinin yüksəlməsinə, böyrək balansının pozulmasına və uzunmüddətli perspektivdə ürək xəstəliklərinə səbəb ola bilər” .

Mütəxəssislər xüsusilə yüksək təzyiq və ürək-damar problemi olan insanlara bu vərdişdən uzaq durmağı tövsiyə edir.

Zeytun asan həzm olunan qida sayılır, lakin bəzi pendir növləri – xüsusilə kaşar, tulum və yaşlı pendirlər – həzmi ləngidir. Bu da mədə turşusunun balansını pozaraq, şişkinlik, reflü və ürək yanması kimi narahatlıqlara səbəb ola bilər.

Zeytun da, pendir də fermentləşdirilmiş qidalardır. Lakin eyni anda istehlak edildikdə, bağırsaq florasında “fermentasiya müdaxiləsi” deyilən təsir yarana bilər. Bu, qaz, qəbizlik, ishal kimi problemlər və immunitetin zəifləməsi ilə nəticələnə bilər.

Mütəxəssislər zeytun və pendiri birlikdə yemək əvəzinə, onları lifli tərəvəzlərlə – pomidor, xiyar, göyərti və ya qozla birləşdirməyi məsləhət görürlər. Bu cür tərkib həm həzmi dəstəkləyir, həm də duzun mənfi təsirlərini azaldır.

Qidalanma ekspertləri bildirirlər ki, ənənəvi səhər yeməyində edilən bu sadə, lakin yayılmış səhv uzunmüddətli dövrdə ciddi sağlamlıq problemlərinə yol aça bilər.