Dünyanın gözü Livandadır. İsrail ordusu Livan sərhədinə toplaşır.

KONKRET.az xəbər verir ki, Hizbullah İsrailin Livana hücum edəcəyi təqdirdə sərt cavab verəcəyini bildirib. Qərb ölkələri isə öz növbəsində bölgə üçün qırmızı həyəcan siqnalı verib.

Hizbullahın Livandakı baş katibinin müavini Şeyx Naim Kasım bildirib ki, bu müharibədə daha çox itki olacaq:

“İsrailin təhdidlərinə qətiliklə icazə verməyəcəyik. Əksinə, bu, bizi daha ehtiyatlı hazırlıqlar etməyə sövq edir. Bunlar boş təhdidlərdir. İsrail hədələrlə nəyəsə nail ola bilməyəcək.

Bu arada İsrail ordusu Livanın cənubundakı Hadasa qəsəbəsinə hava hücumu təşkil edib. Hizbullah isə cavabında Şebaa Farms bölgəsindəki hərbi mövqeyi hədəf alıb. Şahidlərdən alınan məlumata görə, İsrail döyüş təyyarələri Bint Jubeil rayonunun Hadasa qəsəbəsinə hava hücumu həyata keçirib.

Müharibə ehtimalı gücləndikcə, saysız-hesabsız ölkədən “Livanı tərk edin” çağırışları gəlməkdə davam edir. Kanadanın ardınca ABŞ, Rusiya, Almaniya, Hollandiya və İrlandiya da öz vətəndaşlarına Livana səyahətdən çəkinmələri barədə xəbərdarlıq ediblər.

Avstraliya İsrail-Livan sərhədində artan gərginliyə görə vətəndaşlarına bir sıra qadağalar tətbiq edib.

Hindistanın Beyrutdakı səfirliyindən edilən yazılı açıqlamada isə deyilir ki, Livandakı Hindistan vətəndaşlarına “son dərəcə diqqətli olmaq və səfirliklə əlaqə saxlamaq” mövzusunda xəbərdarlıq edilib.

BMT-dən də Livana xəbərdarlıq gəlib. BMT baş katibinin humanitar məsələlər və fövqəladə yardım koordinatoru Martin Qriffiç xəbərdarlıq edib ki, İsrail və Hizbullah arasında müharibə yayılarsa, bu, bölgədə “sönməz bomba” effekti yarada bilər.

İsrailin müdafiə naziri Yoav Qallant Livanla müharibə ehtimalını gizlətməyib:

“İsrail ordusu Hizbullahla hər hansı bir müharibə olacağı təqdirdə Livanı daş dövrünə qaytarmaq gücündədir”.

Natiq Səlim,

KONKRET.az