Microsoft Çindəki işçiləri üçün əhəmiyyətli dəyişiklik edib və Android telefonlarının iş məqsədləri üçün istifadəsini qadağan edib.
KONKRET.az xarici KİV-ə istinadən xəbər verir ki, 2024-cü ilin sentyabr ayından etibarən bütün işçilər üçün iPhone-dan biznes məqsədləri üçün istifadə etmək məcburi olacaq.
Şirkət bu qərarın verilməsinə səbəb kimi Çində Google Play Store-un olmamasını göstərib. Bu, Microsoft-un autentifikasiya proqramları olan “Microsoft Authenticator” və “Identity Pass”ın Android cihazlarında əlçatmaz olmasına səbəb olub. Bu proqramların təhlükəsizliyini təmin etmək üçün Microsoft bütün işçilərindən iPhone-dan istifadə etməyi tələb edib.
Qadağanın tətbiqi ilə hazırda Android telefonlarından istifadə edən bütün işçilərə iPhone 15 veriləcək. Bu dəyişiklik Huawei, Xiaomi, Redmi və OnePlus kimi brendlərin cihazlarından istifadə edən Microsoft işçilərini də əhatə edəcək.
Microsoft öz işçilərinə yeni iPhone-lara uyğunlaşmaq üçün təlim və dəstək proqramları təklif edəcək. Bu proqramlar işçilərə keçid prosesini rəvan şəkildə tamamlamağa kömək etmək məqsədi daşıyır.
Bu qərar “Microsoft”un Çindəki bəzi potensial müştəriləri və tərəfdaşları arasında narahatlıq yarada bilər. Bununla belə, şirkətin təhlükəsizlik və uyğunluğa sadiqliyi bu dəyişikliyin əsas səbəbidir.
Microsoft hesab edir kiI qəbul edilən bu qərar şirkətin Çindəki əməliyyatlarını və təhlükəsizlik strategiyalarını formalaşdıran mühüm addımdır.
Günel Mikayılova,
KONKRET.az