Konkret.az yerli mediaya istinadla xəbər verir ki,  Özbəkistanda özəl notariat kontorlarına yenidən icazə verilib. Bu, Prezident Şövkət Mirziyayevin notariat sistemində islahatların aparılması tədbirləri haqqında sərəncamında nəzərdə tutulur.

İlk özəl notariusların 2020-ci il yanvarın 1-dən etibarən yaradılmasına icazə verilir. Bu dəyişikliklər dövlət notarial nəzarətində növbəni azaldacaq.

Digər bir vacib məqam – əmlakla əlaqəli əməliyyatların qeydiyyatı zamanı bir sıra tələblər ləğv edilib.

Belə ki, gələn ilin 1 yanvar tarixindən etibarən yarımçıq tikilmiş yaşayış sahəsinin özgələşdirilməsi zamanı hakimiyyət orqanlarının razılığını almaq lazım deyil.

Bir sıra əməliyyatlar üçün məcburi notarial təsdiqləmə proseduru da ləğv edilir.

Beləliklə, 1 oktyabr 2019-cu il tarixindən etibarən yaxın qohumlar arasında nəqliyyat vasitələrindən istifadə və idarəetmə hüququ üçün notarial qaydada təsdiq edilmiş etibarnamə ləğv edilir.

Bundan əlavə, 2020-ci il yanvarın 1-dən etibarən ilkin bazarda əmlak almaq üçün müəssisələrin icarəyə verilməsi və pulsuz istifadəsi, ipoteka, girov və icarəyə verilməsi barədə müqavilənin məcburi notarial təsdiqi qaydası ləğv edilir.

Rəhim Əliyev