Bəzən vətəndaşların istifadə etdiyi bankomat kartı geri qaytarmır və belə hallarda insanlar tərəddüd yaşayır. Xüsusilə də hadisə qeyri-iş saatlarında baş verərsə, vəziyyət daha da çətinləşir. Maraqlıdır, bankomat kartı “udarsa” vətəndaş nə etməlidir?

Mövzu ilə bağlı iqtisadçı ekspert Əkrəm Həsənov KONKRET.az-a açıqlamasında bildirib ki, hər bir bankın bu məsələ ilə bağlı öz qaydaları mövcuddur və bu, adətən müştəri ilə bağlanan müqavilədə də qeyd olunur:

“Adətən qaynar xətlər fəaliyyət göstərir. Həmçinin kartın aid olduğu kart təşkilatına məsələn, Azəricard və ya Millicard-a da məlumat vermək mümkündür. Əgər hadisə iş saatları xaricində baş veribsə, həmin an bankomat qarşısında gözləməyə ehtiyac yoxdur. Sadəcə, növbəti iş günü bankla əlaqə saxlamaq və məlumat vermək kifayətdir. Bank bununla bağlı tədbir görəcək”.

Ekspert əlavə edib ki, qeyri-iş saatlarında bankomatlara texniki xidmət göstərilmir, buna görə də ən doğru addım kartın “udulduğu” barədə banka və ya kart xidmət təşkilatına vaxtında məlumat verməkdir.

Aynurə İsmayıl

KONKRET.az