ABŞ Böyük Britaniyanın müdafiə xərclərini artırmaması halında Londonun Folklend adaları üzərində suverenliyi məsələsindən təzyiq vasitəsi kimi istifadə imkanını nəzərdən keçirir.

KONKRET.az xəbər verir ki, “The Telegraph” yazır ki, bu təklif Pentaqon rəsmilərinin NATO müttəfiqlərini müdafiə xərclərini ÜDM-in 5 faizinə çatdırmaq öhdəliyini yerinə yetirməyə təşviq etmək üçün nəzərdən keçirdiyi tədbirlərdən biridir.

Yüksək rütbəli amerikalı məmurun sözlərinə görə, Vaşinqton NATO ölkələrinin müdafiə öhdəliklərini qiymətləndirərkən Böyük Britaniyaya xüsusi diqqət yetirə bilər. ABŞ müttəfiqlərin müəyyən edilmiş hədəfə çatmaq üçün real planlarının olub-olmadığını qiymətləndirməyi planlaşdırır.

Vaşinqton hesab edir ki, Böyük Britaniya ABŞ-ın əsas müdafiə tərəfdaşlarından birinə çevrilmək potensialına malikdir. Bununla belə, amerikalı rəsmilər iyunda keçmiş baş nazir Kir Starmerin təqdim etdiyi müdafiə xərclərinin artırılması planını kifayət hesab etmirlər.

“Britaniyaya xüsusi diqqət yetiriləcəyini gözləyirəm, çünki onun böyük potensialı var. Buna görə də biz Britaniyanın əhəmiyyətli irəliləyiş əldə etməsi üçün səylərimizi davam etdirəcəyik”, – deyə amerikalı məmur bildirib.

“The Telegraph”ın məlumatına görə, Vaşinqtonun bu mövqeyi hazırkı baş nazir Endi Börnhəm və maliyyə naziri Con Hilli üçün narahatlıq yarada bilər.

Qeyd olunur ki, Böyük Britaniyanın hazırkı büdcəsi müdafiə xərclərinin 2030-cu ilə qədər ÜDM-in 3 faizinə çatdırılmasını nəzərdə tutmur. Bu isə Londonla Vaşinqton arasında müdafiə xərcləri məsələsində fikir ayrılıqlarını daha da dərinləşdirə bilər.

Günay Əli 

KONKRET.az