Son günlər artan inflyasiya və eynilə uşaq xərcləri boşanma zamanı uşaqlar üçün ödənilən aliment məbləğinin artırılması məsələsini yenidən gündəmə gətirib. Hazırda minimum aliment məbləğinin 260 manat olması sosial şəbəkələrdə müzakirə edilərək bu məbləğin kifayət etmədiyi qeyd edilir.

Bəs alimentin artırılması gözlənilir?

KONKRET.az xəbər verir ki, məsələ ilə bağlı Pravda.az-a açıqlama verən Milli Məclisin İnsan hüquqları komitəsinin üzvü Razi Nurullayevin sözlərinə görə, aliment məsələsində əsas məqsəd sadəcə rəqəmi artırmaq deyil, uşağın real və davamlı təminatını qorumaq olmalıdır.

Deputatın sözlərinə görə, məsələyə birtərəfli yanaşmaq olmaz: “Bu gün uşaqlar üçün yaşayış minimumu 260 manatdır. Təbii ki, ərzaq, geyim, təhsil, dərman, kommunal və digər xərclərin qiyməti artırsa, aliment məbləğinin də buna uyğun olub-olmaması məsələsi gündəmə gəlir. Uşağın xərcləri ilə yanaşı, aliment ödəyən valideynin də real gəliri və maddi vəziyyəti nəzərə alınmalıdır. Məgər həmin şəxsin qazancı da eyni şəkildə artıb? Onun başqa övladları, ailə və yaşayış xərcləri varmı? Əgər insanın ödəmə qabiliyyəti nəzərə alınmadan aliment məbləği artırılarsa, nəticədə daha böyük aliment borcu yarana bilər. Bu isə nə uşağın, nə də valideynlərin problemini həll edir. Ona görə hesab edirəm ki, düzgün yanaşma belə olmalıdır: uşağın layiqli təminatı təmin edilsin, amma aliment ödəyən valideynin real maliyyə imkanları da obyektiv şəkildə qiymətləndirilsin. Qanunvericilik də məhz bu prinsipi nəzərdə tutur: alimentin məbləği tərəflərin maddi və ailə vəziyyəti nəzərə alınmaqla müəyyən edilə və sonradan vəziyyət dəyişdikdə yenidən dəyişdirilə bilər. Yəni məsələ sadəcə “260 manat azdır, artırılsın” deməkdən ibarət deyil. Əsas sual budur: uşağın ehtiyaclarını real şəkildə necə qarşılamaq və eyni zamanda aliment ödəyən valideynin də ödəmə qabiliyyətini necə qorumaq olar? Məncə, gələcək müzakirələrdə məhz bu balans əsas götürülməlidir”.