KTMT-yə üzv dövlətlərin liderləri noyabrın 11-də keçiriləcək Kollektiv Təhlükəsizlik Şurasının iclasında Ermənistanın təşkilatda gələcək üzvlüyü məsələsini nəzərdən keçirə bilər.

KONKRET.az axaraz-a istinadən xəbər verir ki, bunu KTMT-nin Baş katibi Taalatbek Masadıkov İrəvanın təşkilatdakı statusunun rəsmiləşdirilməsi ehtimalını şərh edərkən deyib.

Onun sözlərinə görə, bu həssas məsələyə baxılması qarşıdakı yüksək səviyyəli görüşün rəsmi gündəliyindən asılıdır:

“Sözügedən məsələ Kollektiv Təhlükəsizlik Şurasının iclasının gündəliyinə daxil edilərsə, bu, baş verə bilər”.

Baş katib həmçinin Ermənistan tərəfinin yüksək siyasi səviyyədə iştirakını dondurmasına və bir sıra tədbiri boykot etməsinə baxmayaraq, İrəvanla işgüzar dialoqun tamamilə dayandırılmadığını qeyd edib:

“Ermənistanın daimi nümayəndəsi təşkilatın Daimi Şurasının iclaslarında hər həftə iştirak edir və görünür, müzakirə olunan bütün məsələlər barədə ölkəsinə məlumat verir”.

Bununla belə, o, Ermənistanın təşkilatdan “de-fakto” çıxdığını da təsdiqləyib.

“Onlar (Ermənistan – red.) həftəlik hesabatları dinləyirlər, lakin əsas tədbirlərimizdə, təlimlərimizdə və sairədə iştirak etmirlər”, – Masadıkov əlavə edib.