Bazarlarda və mağazalarda satılan bəzi bitki yağları tərkibindəki kimyəvi əlavələr və keyfiyyətsiz istehsal səbəbindən insan sağlamlığına ciddi ziyan vura bilər. Bu yağlardan istifadə etmək bir çox xəstəliyin yaranmasına səbəb ola bilər, xüsusilə də ürək-damar xəstəlikləri, xolesterin yüksəlməsi və həzm problemləri.
KONKRET.az zərərli və keyfiyyətsiz yağları ayırd etmək üçün bəzi nümunələr təqdim edir.
Etiketdə qeyd olunan tərkibi diqqətlə oxuyun. Trans yağlar və ya hidrogenləşdirilmiş yağların istifadəsi məhsulun keyfiyyətsiz olduğunu göstərə bilər. Keyfiyyətsiz yağlar adətən daha tünd rəngə malik olur və kəskin xoşagəlməz qoxu yayır. Təbii bitki yağları isə açıq rəngdə və yüngül qoxulu olmalıdır.
Həddindən artıq ucuz qiymətə satılan yağlar şübhəli ola bilər. Ucuzluq, adətən, istehsalda aşağı keyfiyyətli xammalın istifadə edildiyini göstərir. Sertifikatı və keyfiyyət zəmanəti olan tanınmış brendlərə üstünlük verin. Çünki qeyri-rəsmi istehsal olunan məhsulların keyfiyyəti şübhəli ola bilər.
Yağın saxlandığı yer də onun keyfiyyətinə təsir edir. Günəş işığı altında saxlanılan yağlar tez bir zamanda zərərli maddələrə çevrilə bilər.
Hansı yağlardan uzaq durmaq lazımdır?
Palm yağı: Aşağı keyfiyyətli məhsullarda tez-tez istifadə olunur və tərkibində yüksək miqdarda doymuş yağlar var.
Trans yağlar: Marqarin və bəzi emal olunmuş qidalarda olan trans yağlar sağlamlıq üçün son dərəcə təhlükəlidir.
Rafinə edilmiş yağlar: Bu yağlar kimyəvi proseslərdən keçərək təbii xüsusiyyətlərini itirir və qida dəyəri azalır.
Alternativ olaraq nə seçmək olar?
Zeytun yağı: Soyuq sıxma üsulu ilə hazırlanmış təbii zeytun yağları sağlamlıq üçün faydalıdır.
Kətan yağı: Omega-3 yağ turşuları ilə zəngin olan bu yağ ürək-damar sağlamlığı üçün idealdır.
Kokos yağı: Təbii şəkildə əldə edilmiş kokos yağı orqanizm üçün faydalıdır.
Bitki yağı alarkən bu məqamlara diqqət yetirmək sizi zərərli məhsullardan qorumaqla yanaşı, sağlamlığınızı da qoruyacaq./ajansaz