ABŞ prezident Donald Trampın xüsusi nümayəndəsi Con Uitkoff bildirib ki, Hamasın Qəzza sektorunda atəşkəs barədə ABŞ-ın irəli sürdüyü təklifə verdiyi cavab tamamilə qəbuledilməzdir və danışıqlar prosesini geriyə atıb.

KONKRET.az xəbər verir ki, Uitkoff vurğulayıb ki, Vaşinqtonun təklifi sülh danışıqları üçün əsas kimi nəzərdə tutulub və Hamas bu təklifi qəbul etməlidir. Onun sözlərinə görə, tərəflər arasında danışıqların gələn həftə keçirilə biləcəyi gözlənilir və bu dialoq atəşkəsin təmin olunması üçün vacibdir.

O əlavə edib ki, ABŞ regionda davam edən münaqişənin sülh yolu ilə həllinə böyük önəm verir və hər iki tərəfi konstruktiv mövqe tutmağa çağırır. Uitkoff həmçinin qeyd edib ki, atəşkəs üçün əlverişli şəraitin yaradılması bütün tərəflərin maraqlarına uyğundur və buna nail olmaq üçün diplomatik səylər davam etdirilir.

Hamasın təklifi qəbul etməməsi müzakirələrin gedişatına mənfi təsir göstərib və sülh prosesinin irəliləməsinə ciddi əngəl yaradır.

Natiq Səlim,
KONKRET.az