Ali Məhkəmədə həbsdə olan şəxsi azadlığa buraxdırmaq adı ilə yaxınlarından 190 min manat almaqda təqsirləndirilən dəstənin üzvləri – Əlizamin Ağayev, Əli Vəliyev və Fərid Piriyevin barəsindəki qərardan verilən kassasiya şikayəti üzrə məhkəmə iclası başa çatıb.

KONKRET.az pravdaaz-a istinadən xəbər verir ki, hakim Teyyub Muxtarovun sədrliyi ilə keçirilən prosesdə qərar elan olunub.

Qərara əsasən, Bakı Apellyasiya Məhkəməsinin qərarı təqsirləndirilən şəxslərdən birinə – Əlizamin Ağayeva aid hissədə dəyişdirilib. Ona təyin edilmiş 4 il 6 ay 19 gün azadlıqdan məhrum etmə müddətindən, ibtidai istintaq zamanı 5.5.2023-cü il tarixdən 11.5.2023-cü il tarixə kimi “ev dustaqlığı”nda olduğu 6 gün müddət çıxılıb və təqsirləndirilən şəxsin üzərində qəti olaraq 4 il 6 ay 13 gün müddətinə azadlıqdan məhrumetmə cəzası saxlanılıb.

İttihama görə, onlar Lənkəran Ağır Cinayətlər Məhkəməsinin hökmü ilə 14 il 6 ay müddətinə həbs cəzası almış E.İsmayılovun yaxınlarını aldadıblar. Həmin şəxslər özlərini nüfuzlu və vəzifəli şəxs kimi təqdim ediblər və bu işi həll edəcəklərinə vəd veriblər. Həmçinin dəstə üzvlərinin bir neçə digər vətəndaşa qarşı da dələduzluq edərək xeyli pullarını ələ keçirməsi məlum olub.

Qeyd: Təqsirləndirilən şəxslərdən Əlizamin Ağayev Türkiyədə təhsil alandan sonra 2017-2018-ci illərdə Bakı Şəhər Prokurorluğunun İstintaq İdarəsində baş mütəxəssis vəzifəsində çalışıb. Təqsirləndirilən şəxslərdən Fərid Piriyev onun sinif yoldaşı olub.

Bakı Ağır Cinayətlər Məhkəməsinin hökmü ilə hər 3 şəxsə 5 il həbs cəzası verilib. Lakin Əli Vəliyevin cəzası şərti hesab edilib və onun barəsindəki ev dustaqlığı qərarı ləğv edilərək polisin nəzarəti altına verilmə qətimkan tədbiri ilə dəyişdirilib. Bakı Apellyasiya Məhkəməsi onların apellyasiya şikayətini təmin etəyib.