Məmmədov Murad Tofiq oğlu 2057 nömrəli məhkəmə-psixiatrik ekspertiza rəyinin tam araşdırılmasını, əvvəlki tibbi sənədlərlə müqayisə edilməsini və Zaqatala Hərbi Prokurorluğunun qərarının ləğvini tələb edir.
KONKRET.az-ın redaksiyasına Məmmədov Murad Tofiq oğlu tərəfindən müraciət daxil olub. Şikayətçi Zaqatala Hərbi Prokurorunun köməkçisi Fədai Nurunun 14 avqust 2025-ci il tarixli, cinayət işinin başlanmasının rədd edilməsi haqqında qərarından narazıdır. O, Azərbaycan Respublikasının Prezidentinə, Zaqatala Hərbi Prokuroruna və Baş Prokurorluğa müraciət edərək tibbi sənədlər arasındakı ziddiyyətlərin araşdırılmasını və işə yenidən hüquqi qiymət verilməsini istəyir.
Bəs şikayətin əsasını hansı məqamlar təşkil edir?
Müraciət 20C-25 nömrəli araşdırma materialı çərçivəsində qəbul edilmiş qərarla və 25 iyun 2025-ci il tarixli, 2057 nömrəli məhkəmə-psixiatrik ekspertiza rəyi ilə bağlıdır.
Murad Məmmədovun bildirdiyinə görə, ekspertiza rəyinin 7-ci və 8-ci səhifələrində ona qoyulmuş F07.0 — “Üzvi mənşəli şəxsiyyət pozuntusu” diaqnozunun uşaqlıqdan mövcud olan ağır gedişli perinatal toksik-travmatik ensefalopatiyanın uzaq nəticələrindən biri olduğu qeyd edilib.
Şikayətçi hesab edir ki, bu nəticə 2003–2016-cı illəri əhatə edən tibbi sənədlərlə birlikdə qiymətləndirilməli idi. Onun iddiasına əsasən, Zaqatala Hərbi Prokurorluğunun qərarında əvvəlki tibbi tarixçəyə və 2057 nömrəli ekspertiza rəyindəki nəticələrə lazımi diqqət yetirilməyib.
Müraciətdə diqqət çəkilən əsas məqamlardan biri Akademik M.Ə. Mir Qasımov adına Respublika Klinik Xəstəxanasının 22 iyun 2017-ci il tarixli, 4438 nömrəli sağlamlıq vəziyyətinin müayinə edilməsi aktıdır.
Murad Məmmədovun təqdim etdiyi məlumatlara əsasən, həmin sənəddə “sinir sistemi tərəfindən patologiya aşkar edilməmişdir” nəticəsi göstərilib. Halbuki şikayətçinin sözlərinə görə, 2003–2016-cı illərə aid tibbi sənədlərdə ensefalopatiya, epileptik sindrom və digər nevroloji problemlərlə bağlı qeydlər mövcuddur.
Şikayətçi əvvəlki tibbi sənədlərdə əksini tapan məlumatlarla 2017-ci ildə verilmiş nəticə arasındakı fərqin hansı tibbi əsaslarla yarandığının araşdırılmasını vacib sayır. O, həmin aktın hazırlanması zamanı əvvəlki tibbi məlumatların nəzərə alınıb-alınmadığına, müayinə nəticəsinin hansı əsaslarla formalaşdırıldığına aydınlıq gətirilməsini istəyir.
Müraciətdə vurğulanır ki, məqsəd hər hansı şəxsi əvvəlcədən təqsirli elan etmək deyil. Əsas tələb tibbi nəticənin obyektivliyinin və əsaslılığının müvafiq qaydada yoxlanılmasıdır.
Şikayətdə digər mühüm məsələ Akademik M.Ə. Mir Qasımov adına Respublika Klinik Xəstəxanasının mülki tibb müəssisəsi olması ilə bağlıdır.
Murad Məmmədov hesab edir ki, müəssisənin əməkdaşlarının xidməti fəaliyyəti ilə əlaqədar mümkün hüquqazidd halların hansı prokurorluq orqanının araşdırma səlahiyyətinə aid olduğu ayrıca müəyyənləşdirilməlidir. Bu səbəbdən o, məsələnin aidiyyəti üzrə, xüsusilə Şəki Rayon Prokurorluğunda araşdırılmasını xahiş edir.
Həmin məsələyə hansı hüquqi qiymətin veriləcəyi isə araşdırmanın nəticələrindən və müvafiq prosessual normalardan asılıdır.
Murad Məmmədovun əsas tələbi 2003–2016-cı illərə aid tibbi sənədlərin, 2017-ci il tarixli 4438 nömrəli müayinə aktının və 25 iyun 2025-ci il tarixli 2057 nömrəli məhkəmə-psixiatrik ekspertiza rəyinin qarşılıqlı əlaqədə araşdırılmasıdır.
Şikayətçi Zaqatala Hərbi Prokurorunun köməkçisi Fədai Nurunun 14 avqust 2025-ci il tarixli qərarının ləğv edilməsini, ekspertiza rəyindəki nəticələrin tam nəzərə alınmasını və 2017-ci il tibbi aktının əsaslılığının yoxlanılmasını tələb edir. O, həmçinin zərurət yaranarsa, əlavə və ya komisyon ekspertizanın təyin edilməsini və araşdırmanın nəticəsi barədə ona yazılı məlumat verilməsini istəyir.
Müraciətdə Azərbaycan Respublikasının Baş Prokurorluğundan şikayətin nəzarətə götürülməsi, araşdırmanın hərtərəfli və obyektiv aparılmasının təmin edilməsi, materialın aidiyyəti üzrə araşdırılmasına nəzarət olunması xahiş edilir.
Şikayətçinin mövqeyinə görə, 2017-ci ildə verilmiş tibbi nəticə ilə 2025-ci il məhkəmə-psixiatrik ekspertizasının nəticələri arasındakı fərqlər aydınlaşdırılmadan məsələyə yekun hüquqi qiymət verilməsi düzgün olmazdı.
Qeyd edək ki, müraciətdə irəli sürülən iddialar şikayətçinin mövqeyini əks etdirir. Tibbi sənədlər arasındakı fərqlərin səbəbləri, mümkün qanun pozuntularının olub-olmaması və qərarın qanuniliyi səlahiyyətli orqanların araşdırması nəticəsində müəyyənləşdirilməlidir.
Natiq Səlim
KONKRET.az