Azərbaycanın əhalisinin, iqtisadi fəaliyyətinin və dövlət idarəçiliyinin əsas hissəsinin Bakıda cəmləşməsi uzun illərdir müzakirə olunan məsələlərdəndir. Paytaxtda artan əhali və nəqliyyat sıxlığı, ekoloji yük, eləcə də infrastruktur problemləri fonunda dövlət idarəçiliyinin daha balanslı təşkili məqsədilə paytaxtın Gəncə şəhərinə köçürülməsi ilə bağlı zaman-zaman müxtəlif təkliflər səsləndirilir.
Bəs belə bir addım mövcud problemlərin həllinə nə dərəcədə töhfə verə bilər?
Mövzu ilə bağlı KONKRET.az-a danışan Ağ Partiyasının sədri Tural Abbaslı bildirib ki, dünya təcrübəsində müxtəlif səbəblərdən paytaxtların köçürüldüyü nümunələr mövcuddur:
“Müxtəlif dövrlərdə və müxtəlif ölkələrdə paytaxtların köçürülməsi halları olub. Adətən bu qərarlar təhlükəsizlik, siyasi və ya demoqrafik səbəblərlə əlaqədar qəbul edilir.
Bu gün Azərbaycanın demək olar ki, bütün əsas resursları Bakıda cəmləşib. Bu vəziyyət regionların inkişafını ləngidir, eyni zamanda paytaxtın həddindən artıq yüklənməsinə və qeyri-normal inkişaf istiqamətinə səbəb olur. Ancaq düşünmürəm ki, paytaxtın Gəncəyə köçürülməsi bu problemi həll edər.”
Siyasi partiya sədri hesab edir ki, belə bir qərar qəbul olunarsa, Gəncə də zamanla Bakının kiçik modelinə çevriləcək:
“Gəncə Azərbaycanın ikinci böyük şəhəridir və kifayət qədər əhaliyə malikdir. Paytaxt ora köçürülsə, nəticədə Gəncə də Bakının üzləşdiyi problemlərlə qarşılaşacaq. Vaxtilə Yevlaxın paytaxt olması təklif edilirdi. Hətta yeni şəhərin salınaraq paytaxtın ora köçürülməsi ideyası da səsləndirilmişdi. Qarabağ işğaldan azad olunduqdan sonra Ağdamın paytaxt olması ilə bağlı təkliflər də gündəmə gəlmişdi.”
Tural Abbaslı vurğulayıb ki, paytaxtın köçürülməsi Bakının nə ekoloji yükünü, nə də digər problemlərini effektiv şəkildə həll edə bilər:
“Bu proses milyardlarla dollar vəsait tələb edir. Həmin maliyyəni paytaxtın köçürülməsinə deyil, iqtisadiyyatın regionlar üzrə şaxələndirilməsinə yönəltmək daha məqsədəuyğun olardı. Regionlarda yeni iş yerləri açılmalı, investisiyalar artırılmalıdır. İnsanlar öz bölgələrində işləyib qazanc əldə
etməlidirlər ki, regionlar boşalmasın və bütün iqtisadi yük yalnız Bakının üzərinə düşməsin. Məncə, paytaxtın köçürülməsi çıxış yolu deyil.”
Aynurə İsmayıl
KONKRET.az