Dənizdə sevginin ən qorxunc forması: Erkək balıq dişinin bədəninə necə birləşir?

Bu gün bəzi balıq növlərinin sevgi münasibətləri haqqında dəhşətli, qeyri-adi və eyni zamanda heyrətamiz bir fakt öyrəndim.

Söhbət dərin sularda yaşayan fənərbalıqlardan gedir. “Nemonun axtarışında” cizgi filmində başının üstündə işıq saçan tilovu olan, iti dişli qorxunc dəniz canlılarını xatırlayırsınız?

Bu balıqların cütləşmə üsulu təbiətin ən qəribə hadisələrindən biridir.

Dişi fənərbalıqlar iri, qorxunc və iti dişli olurlar. Erkəklər isə əksinə, olduqca kiçik və bəzi növlərdə görmə qabiliyyəti zəif inkişaf etmiş canlılardır. Onların həzm sistemi də xeyli zəif inkişaf edib. Buna görə də bir çox erkək fənərbalığı müstəqil qidalanmaq və ov etmək imkanından məhrum olur.

Erkəyin qarşısında cəmi bir neçə həftəlik fürsət var: qaranlıq okean dərinliklərində dişini feromonların və digər kimyəvi siqnalların köməyi ilə tapmaq. Bunu bacarmasa, aclıqdan ölür.

Amma dişini taparsa, əsl bioloji triller başlayır!

Erkək dişinin qarnına dişləri ilə möhkəm yapışır. Bəzi növlərdə bu birləşmə o qədər güclü olur ki, ayrılmaq artıq mümkün deyil. Dişləmə yerində toxumalar dəyişir, erkəyin dodaqları ilə dişinin dərisi tədricən bir-birinə birləşir. Nəticədə onların qan-damar sistemləri də birləşərək ortaq qan dövranı sistemi yaradır.

Bundan sonra daha qəribə proses baş verir.

Erkəyin gözləri, üzgəcləri və bir sıra daxili orqanları tədricən degenerasiyaya uğrayır. O, müstəqil yaşayan balıq olmaqdan çıxaraq dişinin bədəninə birləşmiş, ondan qidalanan kiçik bir törəməyə çevrilir. Artıq onun əsas funksiyası dişini mayalandırmaq üçün lazım olan spermatozoidləri təmin etməkdir.

Əsl parazitlikdir, elə deyilmi?

Bəzi fənərbalığı növlərinin dişiləri bədənlərində eyni vaxtda altı erkəyə qədər daşıya bilirlər. Beləliklə, dişi ehtiyac yarandıqda çoxalma üçün hazır erkəklərə sahib olur.

Əlbəttə, bu proses bütün fənərbalıqlarında eyni şəkildə baş vermir. Erkəyin dişinin bədəninə tam birləşməsi yalnız müəyyən dərin dəniz növlərinə xasdır.

Amma yenə də mənzərə heyrətamizdir: “ölüm bizi ayırana qədər” ifadəsi burada tamamilə başqa məna qazanır. Söhbət sözün həqiqi mənasında iki bədənin bir orqanizmdə birləşməsindən gedir.

Dişi isə erkəyin təmin etdiyi spermadan öz bioloji imkanlarına uyğun olaraq istifadə edir. Yəni mayalanma üçün əlverişli şərait yarandıqda yumurtalarını mayalandıra bilər.

Təbiət bəzən ən romantik görünən hekayələri belə elə yazır ki, onları qorxu filminin ssenarisi ilə səhv salmaq olar!

Hazırladı: Rəsmiyyə Şərifova,

KONKRET.az