Şüşə qabları yenidən istifadə etmək istəyənlər üçün üzərindəki etiketləri iz qoymadan çıxarmaq bəzən çətin ola bilər.

KONKRET.az pravdaaz-a istinadən bildirir ki, düzgün üsullardan istifadə etməklə həm etiketi, həm də yapışqan qalıqlarını şüşəyə zərər vermədən təmizləmək mümkündür.

Ən təsirli üsullardan biri şüşə bankanı 5–10 dəqiqə isti suda saxlamaqdır. İstidən yumşalan etiket daha sonra asanlıqla soyula bilər. Digər üsul isə saçqurutma feni ilə etiketi qızdırmaqdır. İstilik yapışqanın təsirini azaltdığı üçün etiket daha rahat çıxır.

Etiket çıxarıldıqdan sonra şüşədə yapışqan izi qalarsa, ağ sirkə və ya zeytun yağından istifadə etmək olar. Bu maddələr yapışqan qalıqlarını yumşaldaraq təmizlənməsini asanlaşdırır. Çətin çıxan etiketlər üçün isə qabı isti suda saxlamaq və ya yüksək temperaturda yumaq da kömək edə bilər.

Təmizlənmiş şüşə banka yuyulub qurudulduqdan sonra yenidən saxlama qabı və ya mətbəxdə müxtəlif məqsədlər üçün istifadə oluna bilər.