ABŞ Prezidenti Donald Tramp NATO baş katibi Mark Rütte ilə görüşündə Rusiya Prezidenti Vladimir Putin haqqında sərt, lakin diqqətçəkən açıqlamalar verib. Tramp bildirib ki, Putin keçmiş ABŞ prezidentləri Bill Klintonu, Corc Buşu, Barak Obamanı və hazırkı prezident Co Baydeni aldadıb. “Amma məni aldada bilməz,” – deyə o əlavə edib. Tramp, Putinlə olan söhbətlərinin xoş keçdiyini, lakin dərhal sonra Kiyevə raket hücumlarının başladığını vurğulayaraq, artıq belə danışıqların mənasız olduğunu deyib.

KONKRET.az xəbər verir ki, Tramp Ukraynaya dəstəyin vacibliyini bir daha qabardıb və bildirib ki, ABŞ olmasaydı, Ukraynanın heç bir şansı olmayacaqdı. O, Rusiyanın mövqeyindən razı olmadığını deyib və əlavə edib ki, Rusiya və onun tərəfdaşlarına qarşı 500 faizlik tariflərin tətbiqi mənasız ola bilər. Trampın sözlərinə görə, ABŞ-ın Ukraynaya hərbi yardımı bundan sonra NATO və ABŞ-ın alyansdakı daimi nümayəndəsi Uhitakerin koordinasiyası ilə həyata keçiriləcək.

ABŞ Prezidenti onu da qeyd edib ki, Kiyevə göndəriləcək növbəti hərbi yardımlar təkcə raketlərlə məhdudlaşmayacaq, həm də 17 ədəd “Patriot” hava hücumundan müdafiə sistemi yaxın vaxtlarda döyüş bölgəsinə çatdırılacaq. Trampın fikrincə, əgər Ukrayna ilə bağlı real irəliləyiş əldə olunmasa, ABŞ Konqresin təsdiqinə ehtiyac duymadan əlavə iqtisadi tədbirlər tətbiq edə bilər.

Natiq Səlim,
KONKRET.az