Bakının Nərimanov rayonunda yerləşən 43 saylı Məktəb-Lisey Kompleksinin bərbad vəziyyətdə olması ictimaiyyət tərəfindən geniş müzakirə obyektinə çevrilib. Belə ki, kompleksin sinif otaqları təmirsiz, dəhliz hissəsi az qala uçmaq təhlükəsi ilə üz-üzədir. Sanitar qovşaqlardan isə ümumiyyətlə, danışmamaq yaxşıdır. Çünki antisanitariya və natəmizlik içərisində olan bir yerdən danışmağa dəyməz. Ancaq nəzərə alsaq ki, bu kompleksdə yüzlərlə şagird təhsil alır, gələcəyin ziyalıları böyüyür,  zaman problemin miqyasının nə qədər böyük olduğunu təsəvvür etmək çətin deyil. Bütün bunlar azmış kimi təhsil ocağında bir neçə aydır direktor yoxdur. Direktor səlahiyyətlərini müvəqqəti icra edən Bakı Şəhəri Təhsil Baş İdarəsinin (BŞTBİ) əməkdaşının isə valideynlərdən pul toplamağa cəhd göstərdiyi haqda iddialar yayılıb.

Valideynlərin sözlərinə görə, onlardan sinif otaqları və koridorların təmir edilməsi üçün vəsait yığılması tələb olunub. Bildirilib ki, əks halda övladları yeni dərs ilində məktəbə buraxılmayacaq. Etirazlardan sonra isə valideynlərə təhsil nazirinə müraciət etmək tövsiyə olunub. Halbuki valideynlər hər il təmir adı altında 10-20 manat məbləğində pul yığıldığını iddia edirlər.

Məsələ ilə bağlı KONKRET.az-ın sorğusuna cavab verən Bakı Şəhəri Təhsil İdarəsindən isə bildirilib ki, Məktəb-Lisey Kompleksinin fəaliyyəti idarə tərəfindən nəzarətdə saxlanılır:

“Yeni dərs ilinə hazırlıq çərçivəsində təhsil müəssisələrinin infrastruktur və digər istiqamətlər üzrə ehtiyacları müəyyənləşdirilib və müvafiq tədbirlərin görülməsi nəzərdə tutulur. Məktəb rəhbərliyi tərəfindən valideynlərə bildirilib ki, korpusun təmiri üçün aidiyyəti üzrə müraciət ünvanlanıb. Bununla bağlı valideynlərdən vəsait tələb olunmasına dair səsləndirilən iddialar tamamilə əsassızdır”.

Qurumdan həmçinin bildirilib ki, pedaqoji kollektivin əsas məqsədi yeni dərs ilində məktəbdə daha səmərəli təhsil mühitinin formalaşdırılması və qarşılıqlı etimada əsaslanan münasibətlərin yaradılmasıdır.

Müşviq Tofiqoğlu

KONKRET.az