Ukrayna prezidenti Volodimir Zelenski ilə Rusiya lideri Vladimir Putin arasında görüş olmayacaq. Bu barədə Almaniya kansleri Fridrix Merz açıqlama verib. Bəs, Ukrayna və Rusiya arasında danışıqların dayanmasının əsas səbəbi nədir?

Mövzunu KONKRET.az-a şərh edən politoloq Tural İsmayılov bildirib ki, Ukrayna ilə Rusiya arasında rəhbərlik səviyyəsində görüşün keçirilməməsinin əsas səbəblərindən biri Kremlin aqressiv siyasətini davam etdirməsidir:

“Rusiya bu gün dünyanın gözü qarşısında Ukrayna ərazilərini işğal edib və bu prosesi davam etdirir. Kompromisin hərbi yollarla tapılmamasının bir çox səbəbləri var. Burada həm Rusiyanın adekvat addımlar atmaması, həm də münaqişənin həlli ilə bağlı dünya birliyinin yetərincə aktiv olmaması rol oynayır. Problemin həlli üçün bir çox məqamların işlək olması vacibdir”.

Politoloqun sözlərinə görə, Rusiya işğal etdiyi əraziləri özününkü kimi tanıtmaq üçün yeni iddia və tələblərlə çıxış edir:

“Bu, Ukrayna dövlətçiliyi və apardığı mübarizə baxımından əsla qəbul edilə bilməz. Ona görə də rəhbərlik səviyyəsində görüşlərin keçirilməsi mümkünsüzləşir. Lakin bütün bunlara baxmayaraq, sülh imkanları hələ də tam dayanmayıb”.

Müşviq Tofiqoğlu

KONKRET.az