Ermənistanın Baş naziri Nikol Paşinyan ofisindən yeni görüntülər paylaşıb. Kadrlarda ABŞ prezidenti Donald Tramp tərəfindən hədiyyə olunan fotonun nümayişi diqqət çəkib. Maraqlıdır, Nikol Paşinyanın ofisində Donald Tramp tərəfindən hədiyyə olunmuş fotonun nümayişi hansı siyasi mesaj daşıyır?

Mövzu ilə bağlı KONKRET.az-a danışan siyasi şərhçi Əli Mustafa bildirib ki, Paşinyanın bu addımı Cənubi Qafqazda ABŞ-ın varlığına işarə daşıyır:

“Donald Trampın hədiyyə etdiyi fotonu paylaşmaqla Paşinyan əslində ABŞ-a arxalandığını göstərmək istəyib. Bununla Ermənistan bir növ Vaşinqtonun dəstəyinə söykəndiyini qabardır və bölgədə marağı olan digər güclərə mesaj verir ki, ABŞ artıq Cənubi Qafqazdadır”, – deyə ekspert vurğulayıb.

Əli Mustafa əlavə edib ki, bu mesaj həm də Zəngəzur dəhlizi məsələsi fonunda xüsusi əhəmiyyət kəsb edir:

“ABŞ-ın dəhlizə marağı, onun icarəyə götürülməsi barədə iddialar göstərir ki, Cənubi Qafqaz Vaşinqtonun nüfuz dairəsinə daxil edilməkdədir. Ermənistan da bu gücə arxalanaraq addımlar atır və bölgədə qərar qəbul edəcək digər qüvvələrə bildirir ki, ABŞ-ın mövqeyi nəzərə alınmalıdır”.

Siyasi şərhçinin sözlərinə görə, Paşinyanın ofisində Trampın fotosunu qabartması təkcə şəxsi münasibətlərin nümayişi yox, həm də geosiyasi mesaj xarakteri daşıyır.

Müşviq Tofiqoğlu

KONKRET.az